Prinsinn keypti Bugatti Chiron og Bugatti Vision Gran Turismo

Líklega er það fátt sem prinsinn af Saudi Arabíu getur ekki keypt. Hann var til að mynda að festa sér kaup á tveimur Bugatti bílum, þ.e. Chiron og Vision Gran Turismo og borgaði fyrir þá meira en 5 milljónir dollara.

Það er svosem ekkert nýtt við það að prinsarnir í olíuríkjunum við Persaflóa kaupi sér nýja og flotta bíla, en það sem telst sérstakt við þessi kaup er að hvorugur bílanna er kominn í almenna sölu. Þeir voru báðir sýningareintök og teljast því báðir fyrstu seldu eintökin af þessum gerðum.

Bugatti Chiron er 1.500 hestafla kraftatröll, sem leysir af hólmi Bugatti Veyron. Bugatti hefur ekki hafið sölu þess bíls ennþá og listaverð hans er um 2,5 milljónir dollara. Bugatti Vision Gran Turismo er tilraunabíll sem Bugatti sýndi fyrst á bílasýningunni í Genf í fyrra. Báðir bílarnir eru með 8,0 lítra W16 vél og því ofuröflugir.

Hjá Bugatti kom fram að margir kaupendur hefðu falast eftir þessum tveimur bílum en enginn þeirra boðið eins hátt verð í þá og prinsinn.