Framtíðin á rúntinum með fortíðinni

Einn virkasti bílaklúbbur landsins er Krúser í Reykjavík sem hefur að aðalmarkmiði að viðhalda klassískum bílum og stuðla að varðveislu þeirra. Á hverju fimmtudagskvöldi koma klúbbfélagarnir saman í höfuðstöðvum sínum á Ártúnsholtinu þar sem spjallað er um heima og geyma.

Og þegar vel viðrar mæta félagar á glæsivögnum sínum og taka rúnt um bæinn á eftir til að gleðja augu vegfarenda, ekki síst erlenda ferðamenn sem standa agndofa meðfram Laugavegi þegar hersingin ekur í átt til Hörpu þar sem staldrað er við frameftir kvöldi. Þar koma gestir og gangandi til að skoða dýrgripina og ræða við eigendurna, gjarnan til að fræðast um sögu bílanna.

Á dögunum slóst framtíðin með í för með fortíðinni þegar nokkrir starfsmenn BL mættu á glæsilegum BMW bílum úr sýningarsal fyrirtækisins við Sævarhöfða. Þarna mætti rafmagnaði tvinnsportbíllinn BMW i8, sem er léttasti sportbíllinn á markaðnum og einungis rúmar 4 sekúndur í 100, og svo sportbíllinn M2 sem er hið fullkomna leikfang bílaáhugafólksins sem er líka aðeins rúmar 4 sekúndur í hundraðið.

Óhætt er að segja að bílarnir hafi vakið lukku þeirra sem urðu á vegi þeirra ásamt hinum víðfrægu öldungum sem muna tímana tvenna.