Mitsubishi með nýjan tengiltvinnjeppling í París

Bílaframleiðendur eru þessa dagana að birta fyrstu myndir af þeim nýju bílgerðum sínum sem kynntir verða á bílasýningunni í París, en hún hefst um næstu mánaðarmót. Mitsubishi er engin undantekning frá því og birti þessa mynd í gær af nýjum jepplingi sem bæði gengur fyrir rafmagni og brunavél.

Hann á að geta farið fyrstu 120 kílómetrana eingöngu á rafmagni og heildardrægni hans segja þeir Mitsubishi-menn að sé heilir 1.200 kílómetrar. Bílinn kalla þeir Grand Tourer, sem rímar ágætlega við mikla drægni hans. Mitsubishi Grand Tourer er með vængjahurðum, en ekki skal slá því föstu að framleiðslugerðin, ef að henni verður, verði þannig búin.

Bíllinn er án hliðarspegla og eiga myndavélar að leysa þá af. Til að setja bíl með þessari tækni á markað í Evrópu þarf þó fyrst að leyfa bíla án hliðarspegla, en það hefur ekki enn verið gert í neinu Evrópulandi. Að innan er Grand Tourer þakinn Burgundy leðri og með stóran aðgerðaskjá fyrir miðju.