Slæm hugmynd að nappa Porsche mömmu

Sextán ára unglingsstrákur í Vancouver í Kanada hélt að það væri góð hugmynd að nýta sér það að móðir hans var á ferðalagi í útlöndum og skreppa í bíltúr á Porsche Cayenne jeppa hennar. Sá bíltúr endaði ekki vel eins og hér sést.

Ekki nóg með það að strákurinn ók á kyrrstæðan bíl í bíltúrnum og hreinsaði næstum hjólabúnað bílsins af hægra megin, þá tókst honum einnig að dælda alla hliðina vinstra megin á bílnum við það að reyna að koma bílnum inní bílskúr. Það fórst honum ekki vel úr hendi, enda ekki hlaupið að því að stýra bíl þar sem annað framdekkið rétt hangir á bílnum.

Aðförum hans var náð á myndskeið sem hér sést og það er ekki laust við að áhorfendur finni örlítið til með stráknum í bið hans eftir að mæta mömmu sinni. Ekki nóg með þau vandræði þá bíður hans einnig ákæra vegna þess að hann stakk af frá ákeyrslunni á kyrrstæða bílinn. Nokkur bið gæti orðið á því að þessi óheppni unglingur fái ökuskírteini.