Örfáir dagar lausir í Ytri Rangá

Veiðimenn sem hafa ekki fengið fylli sína á þessu tímabili skima eftir lausum leyfum þessa dagana.

Það er svo sem ekki úr miklu að moða í laxveiði en þó eru laus leyfi í Ytri Rangá og Eystri Rangá, svo má kannski finna eitthvað annað í minni ám en það er þó ekki mikið.  Það er nú einu sinni þannig að eftirspurnin á þessum árstíma er minni en þeir sem vilja kíkja í einhverja veiði leita auðvitað fyrst í árnar sem hafa verið að gefa vel og þar sem veiðivon er góð.

Það er þannig í Ytri Rangá þessa dagana en veiðin í henni hefur verið afskaplega góð í sumar og er áinn sú aflahæsta á landinu með rúmlega 8.600 laxa samkvæmt tölum í gær og það er ennþá mikill fiskur í ánni.  Það er rétt mánuður í að veiði ljúki í Ytri Rangá og það er ekkert ólíklegt að áinn fari í 9.500 laxa miðað við hvernig er að veiðast og þá þarf að vísu líka að hafa í huga að veðrið verði í lagi.  Spáin í næstu viku er góð svo það lítur vel út fyrir þá sem eru á leiðinni í haustveiðina í Ytri.