Frábærir lokadagar í Laxá í Dölum

Nú berast lokatölur frá laxveiðiánum eftir sumar sem var mjög sérstakt en lokaspretturinn var góður víða.

Árnar á vesturlandi áttu erfitt sumar vegna stanslausrar veðurblíðu og þurrka.  Þrátt fyrir að laxgengd væri með ágætum tók fiskurin illa lengst af í flestum ánum vegna hita og vatnsleysis en það má heldur betur segja að þetta ástand, þ.e.a.s. tökuleysið, hafi breyst á síðustu dögunum í ánum.  Þar má til dæmis nefna frábæra lokadaga í Laxá í Dölum og í raun síðustu þrjár vikurnar en á þessum þremur vikum veiddust um 600 laxar.

Lokahollið var til að mynda með frábæra veiði en það holl náði 134 löxum á land á sex stangir á þremur dögum sem er frábær veiði og ótrúlegt að sjá svona tölu svona seint á tímabilinu en þetta endurspeglar ágætlega hvað það var mikið af laxi í ánni í sumar.  Heildartalan í Laxá á þessu sumri er 1.711 laxar sem gerir þetta sumar að sjötta besta árinu í Laxá í Dölum frá 1974.