Annie Mist fékk sér umhverfisvænan töffara

Það var vel við hæfi að CrossFit-meistarinn Annie Mist Þórisdóttir fékk draumabílinn afhentan á Vistvænum dögum HEKLU sem nú standa yfir. Um er að ræða tengiltvinnbílinn Volkswagen Golf GTE sem gengur bæði fyrir rafmagni og bensíni.

Í tilkynningu frá Heklu segir að Annie Mist hafi keyrt Volkswagen frá því hún var sautján ára gömul. Hún fjárfesti í Volkswagen Polo áður en hún fékk bílpróf og þegar kom að því að endurnýja kom ekkert annað til greina en Volkswagen. „Polo-inn var algjör draumabíll og þegar ég ákvað að skipta langaði mig bara í Volkswagen. Ég vildi aðeins stærri bíl í þetta skiptið og fannst Golf alveg fullkominn.“

Annie fannst einnig vistvænn farkostur heillandi og þegar hún og kærastinn, Frederik Ægidius, byrjuðu að reynsluaka kolféllu þau fyrir Golf GTE sem gengur bæði fyrir rafmagni og bensíni. „Við prófuðum Golf GTE og það er svo ótrúlega þægilegt og gaman að keyra hann. Hann er hljóðlátur og tekur einstaklega vel við sér og svo fannst okkur Frederik það vera mjög mikill plús að hann sé umhverfisvænn.“

En hvert skyldi ferðinni vera heitið á nýja bílnum? „Við byrjum á að bruna á æfingu en svo förum við upp í sumarbústað um helgina. Fjölskyldan hans Frederik er að koma til okkar svo við munum fara Gullna hringinn á nýja bílnum í næstu viku. Ég hlakka mikið til að prófa að keyra hann úti á landi.“