Enn meiri seinkun á Tesla Model 3 líkleg

Tesla hefur yfirleitt ekki staðið við áður uppgefnar tímasetningar á útkomu nýrra bíla sinna og engin breyting virðist ætla að vera á í tilfelli hins komandi Tesla Model 3 bíls. Í núverandi áætlunum Tesla á framleiðslan að hefjast um mitt ár 2017 og að fullum afköstum við framleiðslu hans verði náð í enda þess árs.

Nýjustu getgátur frá sérfræðingi hjá Morgan Stanley benda hinsvegar til þess að Tesla muni fresta framleiðslunni til sumars ársins 2018 og að fyrstu bílarnir verði afhentir seint á því ári. Yrði það heils árs seinkun á þessum bíl sem komnar eru 400.000 pantanir í. Það gæti reyndar orðið til þess að margir af þeim sem pantað hafa bílinn hætti við og nenni einfaldlega ekki að bíða svo lengi eftir bílnum sem það hefur pantað.

Morgan Stanley gerir ráð fyrir að framleiðslugetan árið 2019 verði orðin 60.000 bílar og 130.000 bílar árið 2020. Það dugar skammt uppí 400.000 pantanir. Það myndi þýða að þeir sem ekki voru með fyrri skipunum að panta Model 3 fá ekki bíl sinn afhentan fyrr en árið 2021 eða 2022, eða eftir 5 til 6 ár.