Selur Fiat Chrysler bæði Alfa Romeo og Maserati?

Fiat Chrysler Automobiles glímir við mikla skuldir sem nema hátt í 800 milljörðum króna. Til að lækka þessar skuldir hugleiðir Fiat Chrysler nú að selja tvö af bílamerkjum sínum, þ.e. Alfa Romeo og Maserati.

Rekstur Fiat Chrysler hefur gengið þokkalega á síðustu misserum, en þó er hagnaður fyrirtækisins ekki mikill og dugar skammt til að grynnka á miklum skuldum þess. Fiat Chrysler glímir nú einnig við kostnaðarsamar innkallanir á 1,4 milljónum bíla sinna vegna galla í öryggispúðum, sem og hugsanlegar sektir frá National Highway Traffic Safety Administration (NHTSA) í Bandaríkjunum útaf Dodge Durango og RAM 1500 bílunum sem þykja velta of auðveldlega.

Lengi hefur verið uppi orðrómur um sölu Fiat á Alfa Romeo bílamerkinu og fyrir um 6 árum sýndi Volkswagen bílasamstæðan áhuga á merkinu og ætlaði að setja vélar frá Porsche í nýja Alfa Romeo bíla. Sergio Marchionne, forstjóri Fiat Chrysler, ákvað hinsvegar á þessum tíma að halda Alfa Romeo merkinu, en nú gæti það hafa breyst og enn er Marchionne forstjóri Fiat Chrysler.