"Veturinn ræður nú ríkjum“

Suðvestan hvassviðri með dimmum éljum sunnan- og vestanlands er spáð í dag en með hægari suðlægum áttum og snjókomu þar með kvöldinu. Búast má við snjókomu á morgun.

„Veturinn ræður nú ríkjum, eins og vænta má af almanakinu. Í dag gengur á með allhvössum útsynningi og éljum sunnan- og vestanlands. Vindar verða þó hægari á Norður- og Austurlandi og léttir smám saman til þar. Í kvöld kemur smálægð upp að suðurströndinni og fer þá að að snjóa sunnan og vestan til,“ segir í hugleiðingum veðurfræðings sem birtar eru á vef Veðurstofunnar.

„Á morgun leggst hann í ákveðna austanátt og snjóar þá víða, en lægir smám saman og rofar til á Suður- og Vesturlandi. Eftir helgi er síðan spáð norðanáttum með tilheyrandi ofankomu fyrir norðan og austan og kólnandi veðri. Á Suður- og Vesturlandi verður þó víða bjartviðri, en vetrarlegt um að litast.“

Veðurhorfur á landinu næstu daga

Á sunnudag:

Austan 8-15 m/s og slydda eða snjókoma N og A-lands fram eftir degi, en dregur síðan talsvert úr vindi og rofar til. Austan 5-10 og stöku él S- og V-til. Kólnandi veður og frost 0 til 8 stig um kvöldið, minnst við sjávarsíðuna.

Á mánudag:

Gengur í norðaustan 13-20 m/s, hvassast austast. Snjókoma eða él N-til, en slydda austast, en annars þurrt að kalla. Minnkandi úrkoma um kvöldið. Hiti í kringum frostmark.

Á þriðjudag:

Norðankaldi og él austast, en annars hægari og víða bjart. Kólnandi veður.

Á miðvikudag, fimmtudag og föstudag:

Norðaustlæg átt og víða dálítil él, en bjartviðri SV-lands. Víða talsvert frost.