Ný heimasíða og vefsalan komin í gang hjá SVFR

Stangaveiðifélag Reykjavíkur hefur sett vefsöluna í gang eftir nokkrar tafir sem orsökuðust af því að bæði vefsalan og heimsíðan fengu nýtt útlit.

Það er við hæfi að óska SVFR til hamingju með vel lukkaða síðu og söluvef en gamla heimasíðan var fyrir löngu orðin barn síns tíma og þurfti sárlega á yfirhalningu að halda.  Söluvefurinn fékk að sama skapi mikla upplyftingu og í stað tímalínu með lausum dögum er hægt að velja veiðidaga í þeirri á sem óskað er eftir og koma þá fram upplýsingar um verð.  Almennt hafa félagsmenn SVFR gott orð af þessari breytingu þrátt fyrir að hún hafi bara verið í loftinu nokkra daga.

Félagsmenn SVFR og aðrir veiðimenn sofa væntanlega laust í kvöld og bíða morgunsins með mikilli eftirvæntingu en þá hefst veiðisumarið að nýju þegar sjóbirtingsveiðin hefst en einnig opnar fyrir veiði í nokkrum vötnum.  Það stefnir í ágætt veiðiveður á morgun í flestum landshlutum, kaldast verður þó fyrir norðan en skaplegt veður að mestu.  Nú getum við hætt að telja niður dagana og við hjá Veiðivísi óskum ykkur ánægjulegra stunda við bakkann á komandi sumri og hvetjum ykkur til að deila með okkur veiðifréttum af ykkar veiðisvæðum.  Þið getið sent ykkar veiðifréttir og veiðimyndir á kalli@365.is