Grímur tekur tíma­bundið við kyn­ferðis­brota­deildinni

Grímur Grímsson, yfirmaður miðlægrar rannsóknardeildar hjá lögreglunni á höfuðborgarsvæðinu, hefur tekið tímabundið við sem yfirmaður kynferðisbrotadeildar lögreglunnar.

Árni Þór Sigmundsson, sem verið hefur yfirmaður deildarinnar, mun taka við starfi stöðvarstjóra á lögreglunnistöðinni við Vínlandsleið, einnig tímabundið, þar sem Kristján Ólafur Jónsson, sem gegnt hefur því starfi, mun taka við starfi yfirlögregluþjóns á lögreglustöðinni við Hverfisgötu. Egill Bjarnason, sem starfað hefur sem yfirlögregluþjónn, er að láta af störfum vegna aldurs.

Frá þessum mannabreytingum er greint í tölvupósti sem Sigríður Björk Guðjónsdóttir, lögreglustjóri lögreglunnar á höfuðborgarsvæðinu, sendi starfsmönnum í morgun. Í póstinum kemur fram að þessar ráðstafanir séu til og með 30. júní næstkomandi en að tilkynnt verði um frekari tilfæringar eða breytingar þegar ákvarðanir um slíkt liggja fyrir.