Veður heldur leiðinlegt á veiðislóðum

Það er óhætt að segja að hið dæmigerða vorhret gangi nú yfir landið og þessi vika búin að vera ansi umhleypingasöm og það er ekkert betra framundan.

Þeir veiðimenn sem við höfum heyrt í bera sig frekar illa en mikið vatn er í flestum ánum fyrir austan og þá gengur á með snjókomu og rigningu með góðri blöndu af roki sem þykir seint líflegt til útivistar.  Þegar þessum umhleypingum líkur á svo að skella í frost aftur á þá tekur við vesen sem er ansi leiðingjarnt en það er að banka frosið vatn úr lykkjunum.  Þrátt fyrir þetta er nú ekki bilbug að finna því inná milli kemur alltaf smá ró í veðrið og þá er stokkið út og kastað eins og engin sé morgundagurinn.

Sú opnun sem margir bíða eftir er opnun Þingvallavatns 20. apríl en þá fjölmenna veiðimenn við vatnið til að freista þess að ná í stóra urriða sem eru á sveimi við landgrunnið á þessum tíma.  Það eru nokkrir aðilar sem hafa náð góðum tökum á því að finna urriðann við ströndina í Þjóðgarðinum og þegar gengið er á þessa veiðimenn segja þeir eiginlega allir það sama þegar spurt er hvað sé líklegast til árangurs en mikil ástundun spilar þar inní.  Það eru oft ansi margar ferðirnar sem eru farnar upp að vatni áður en vel gengur en eins og þeir sem hafa glímt við tröllin í vatninu þekkja er sú bið bara svo vel þess virði.