Borgarfulltrúar afsala sér launahækkun Kjararáðs

Borgarstjórn samþykkti á fundi sínum í gær tillögu forsætisnefndar borgarinnar um að gera breytingar á samþykkt um kjör og starfsaðstöðu kjörinna fulltrúa.

Borgarfulltrúar afsala sér þar með launahækkun samkvæmt úrskurði Kjararáðs um hækkun þingfararkaups auk þess sem laun þeirra eru ekki lengur tengd framtíðarákvörðunum ráðsins en hingað til hafa laun kjörinna fulltrúa miðast við 78,82 prósent af þingfararkaupi.

Laun borgarfulltrúa munu framvegis hins vegar fylgja launavísitölu samkvæmt tillögunni sem samþykkt var í gær með níu atkvæðum borgarfulltrúa Samfylkingarinnar, Bjartrar framtíðar, Vinstri grænna og Pírata gegn atkvæði Sveinbjargar Birnu Sveinbjörnsdóttur, borgarfulltrúa Framsóknar og flugvallarvina. Aðrir borgarfulltrúar sátu hjá við atkvæðagreiðsluna.

„Ef hækkanir hefðu tekið gildi samkvæmt úrskurði Kjararáðs um hækkun þingfararkaups hefðu grunnlaun borgarfulltrúa hækkað úr kr. 593.720 í kr. 856.949 en með samþykkt borgarstjórnar í dag munu grunnlaun borgarfulltrúa hækka úr kr. 593.720 í kr. 633.505 eða um 6,7%.

 

Með samþykkt borgarstjórnar nú verða hækkanir á launum allra kjörinna fulltrúa hjá Reykjavíkurborg innan viðmiða Salek-samkomulagsins auk þess sem þau muna héðan í frá taka breytingum í samræmi við launavísitölu í stað þess tengingu við þingfararkaup,“ segir í tilkynningu frá Reykjavíkurborg en tillagan sem samþykkt var er eftirfarandi:

 

„Lagt er til að samþykkt verði að gera breytingar á samþykkt um kjör og starfsaðstöðu kjörinna fulltrúa hjá Reykjavíkurborg þannig að heildarlaunakostnaður borgarfulltrúa og þóknanir annarra kjörinna fulltrúa taki framvegis breytingum til samræmis við launavísitölu.

Grunnlaunin skulu miða við þróun launavísitölu frá síðasta úrskurði kjararáðs fyrir upphaf tímabilsins sem rammasamkomulag aðila vinnumarkaðarins miðar við, þ.e. marsmánuð 2013, og uppfærast í janúar og júlí ár hvert. Breytingin skal miðast við 1. nóvember 2016 og er skrifstofustjóra borgarstjórnar falið að vinna nauðsynlegar breytingar á samþykktinni.“