Kaliforníulöggan á 730 hestafla Mustang Saleen

Það slá fá lögregluembætti við Dubai lögreglunni sem hefur í sinni þjónustu mikið safn öflugra sportbíla, en þó finnast önnur lögregluembætti sem skarta mjög öflugum bílum. Riverside lögreglan í Kaliforníu í Bandaríkjunum fékk um daginn afhentan 730 hestafla Ford Mustang sem breytt hefur verið af Saleen breytingafyrirtækinu.

Nokkur hefð er fyrir því að lögreglan í Bandaríkjunum séu með 8 strokka bíla í sinni þjónustu og fyrir 30 árum voru mörg lögregluembætti með Ford Fox Body Mustang með 5,0 lítra 8 strokka vélar sem þó skiluðu ekki nema 225 hestöflum, sem þótti ágætt á þeim tíma.

Riverside lögreglan í Kaliforníu er nú talsvert betur vopnuð með meira en þrefalt afl í sínum nýja Saleen Mustang. Þessi bíll er í grunninn Mustang GT með 435 hestöfl en í meðförum Saleen hafa bæst við næstum 300 hestöfl og hann togar 600 pund-fet. Bílar með þessháttar breytingu bera nafnið Saleen S302.