Forstjóri Ford rekinn

Ford á samkvæmt fréttum frá mörgum bandarískum netmiðlum að hafa rekið forstjóra fyrirtækisins, Mark Fields, nú um helgina. Búist er við því að tilkynning berist frá Ford um brottreksturinn þegar vinnudagurinn hefst verstanhafs í dag.

Líkt og hjá General Motors og Fiat Chrysler hefur Ford ekki tekist að sannfæra kaupahéðna á Wall Street um hversu mikils virði bílaframleiðandinn er og hafa hlutabréf í öll þessum fyrirtækjum verið með lægsta móti á undanförnum árum. Það hefur fallið í afar grýttan jarðveg hjá hluthöfum og er brottrekstur forstjóra Ford ef til vill ein birtingarmynd þess.

Mark Fields hefur verið forstjóri Ford frá árinu 2014. Stjórn Ford ætlar að hrista hressilega uppí yfirstjórn Ford og stólaskiptin mun alls ekki einskorðast við forstjórann. Stjórn Ford, sem leidd er af stjórnarformanninum og Ford erfingjanum Bill Ford, á að hafa misst trúna á því að Mark Fields sé rétti maðurinn til að leiða Ford og ætlar að skipa James P. Hackett í stað hans í stól forstjóra, en hann hefur leitt Smart Mobility-deild Ford.

Síðan Mark Fields settist í stól forstjóra Ford árið 2014 hefur hlutabréfaverð í Ford fallið um 40% og er sú staðreynda vafalaust sú sem ræður mestu um forstjóraskiptin nú.