Farið að bera á mjög legnum laxi á Vesturlandi

Það eru aðeins fjórir dagar frá því að það var stórstraumur og með honum koma silfurslegnir laxar í árnar en þeir eru það sem flestir veiðimenn vilja komast í.

Nýrunninn lax er fullur orku og berst vel en það er einmitt uppistaðan í laxveiðinni á þessum árstíma en þó má finna laxa sem hafa greinilega komið snemma og eru búnir að fella sjóhreistrið og komnir með þennan fallega fjólubláa gljáa.  Það sem aftur ó móti stingur aðeins í stúf á þessum tímapunkti á tímabilinu eru fréttir af mjög legnum löxum og þá sérstaklega í ánum á vesturlandi.  Þetta var til að mynda mjög áberandi í fyrra.

Veiðimenn tala um að þetta sé svipað og í fyrra þegar það sáust og veiddust legnir laxar á efstu svæðum ánna um miðjan júlí.  Myndin sem fylgir þessari frétt sýnir dæmigerðan lit sem haustlaxinn bregður sér í, oftast um lok ágúst og byrjun september.  Þessi mynd er tekin í fyrrasumar við veiðistaðinn Campari í Langá þann 19. júlí.  Þessi lax gæti hafa gengið inn í lok maí eða jafnvel aðeins fyrr.  Eftir að hafa grennslast fyrir um þetta hjá reyndum veiðimönnum eru þeir sammála um að það virðist vera nokkur aukning í að sjá þessa laxa svona vel legna í byrjun júlí en hvers vegna þeir mæta svona snemma virðast ekki vera nein svör við því.  Þetta virðast allt vera stórir hængar og þeir fara líklega hratt upp árnar þegar þeir mæta.