Fyrrum yfirmenn Fiat Chrysler kærðir fyrir fjárdrátt

Þrír fyrrum yfirmenn Fiat Chrysler bílasamstæðunnar hafa verið ákærðir fyrir að stela milljónum dollara úr sjóði fyrirtækisins sem ætlaður var til að standa straum af kostnaði við þjálfun starfsmanna. Einn þessara yfirmanna, Alphons Iacobelli, bar varaforstjóratitil. Hin tvö heita Monica Morgan, ekkja annars varaforstjóra Fiat Chrysler og Jerome Durden sem gegndi starfi fjármálaráðgjafa, en hann var ákærður fyrir yfirhylmingu.

Rannsókn hefur leitt í ljós að Monica Morgan og þálifandi eiginmaður hennar og varaforstjóri, General Holiefield notuðu 1,2 milljónir dollara úr starfsþjálfunarsjóðnum í föt, skartgripi, hús og ferðalög. Til dæmis keyptu þau ferð með einkaflugvél sem kostaði 30.000 dollara.

Iacobelli tók um eina milljón dollara úr sjóðnum til einkanota og gaf auk þess ekki upp þetta fé til skatts, svo hann þarf einnig að svara til saka til skattayfirvalda. Hann keypti til að mynda forláta Ferrari 458 Spider bíl fyrir fjármunina, leigði sér einkaflugvélar, lagfærði hús sitt og eyddi fé í margskonar annan munað. Öllum hefur þessum starfsmönnum verið vikið frá störfum frá Fiat Chrysler. Öll verða þau ákærð fyrir verknaði sína.