Ágætt veður til heimferðar í dag

Veður hefur verið með rólegasta móti þessa verslunarmannahelgi en strax á morgun skiptir veðrið um gír, að því er segir í hugleiðingum veðurfræðings hjá Veðurstofu Íslands. Ágætt veður verður þó til ferðalaga í dag en margir hyggja ef til vill á heimferð.

„Í dag er spáð norðlægri átt, víða á bilinu 3-8 m/s svo vindur ætti ekki að hafa áhrif á þá sem eru á heimleið. Skúrir eða rigning í flestum landshlutum, en yfirleitt þurrt á Vesturlandi eftir hádegi,“ segir í hugleiðingum veðurfræðings.

Vindur um verslunarmannahelgina hefur alla jafna verið hægur, sem veðurfræðingur telur heppilegt, en skúrir hafa þó verið nokkuð tíðar síðustu daga.

„Margir hafa þó fengið á sig skúrir og flestir hefðu viljað hafa meira sólskin, en það verður aldrei á allt kosið.“

Á morgun skiptir veðrið hins vegar um gír. Þá gengur í sunnan kalda eða strekking með rigningu, sem gert er ráð fyrir að verði drjúg seinnipartinn á morgun og annað kvöld. Útlitið næstu daga er því vinda- og vætusamt.

Hér að neðan má sjá veðurhorfur á landinu í dag og næstu daga eins og fram kemur á vef Veðurstofu Íslands:

Í dag og á morgun:

Norðlæg eða breytileg átt 3-8 m/s. Víða skúrir eða rigning, en yfirleitt þurrt á Vesturlandi eftir hádegi. Gengur í sunnan 8-13 á morgun með rigningu og súld. Hægari vindur og birtir til á austanverðu landinu, en bætir í vind og fer að rigna þar annað kvöld. Hiti 8 til 16 stig, hlýjast á Suðurlandi í dag, en á Austurlandi á morgun.

Á miðvikudag:

Breytileg og síðar norðlæg átt 3-10 og víða skúrir eða rigning, en styttir upp að mestu seinnipartinn. Hiti frá 8 stigum á Norðurlandi, upp í 17 stig suðaustanlands.

Á fimmtudag:

Austan og norðaustan 8-13, en 10-18 með suðurströndinni. Víða rigning, en úrkomulítið norðvestantil á landinu. Hiti 8 til 14 stig.

Á föstudag:

Norðaustan og norðan 8-15 og rigning norðaustantil á landinu, en annars þurrt. Hiti 6 til 14 stig, hlýjast sunnanlands.