Ennþá lausir veiðidagar í Elliðaárnar

Veiðin í Elliðaánum hefur verið ágæt í sumar en heildarveiðiner komin í 741 lax sem er nokkuð meira en lokatalan eftir sumarið í fyrra.

Heildarveiðin í Elliðaánum í fyrrasumar var 675 laxar en hefði líklega getað farið hærra ef veður hefði ekki, oft sem fyrr, gert veiðimönnum erfitt fyrir.  Það er alltaf mikill umsóknarþungi um veiðileyfin í Elliðaárnar hjá Stangaveiðifélagi Reykjavíkur og þar komast færri að en vilja.  Það er þess vegna skrítið að sjá jafn skemmtilega daga lausa eins og í september í ánni en haustveiðin þarna getur oft verið mjög lífleg.  Leyfin eru ódýr en veiðinvonin jafnframt góð.  Verðið á stöng er 12.900 fyrir hálfan dag og það er laust jafnt fyrir hádegi sem eftir hádegi einhverja dagana.

Veiðin er mest á efri svæðunum og frá Hundasteinum og upp að Elliðavatnsstíflu má aðeins veiða á flugu en á þessu svæði eru líka skemmtilegir veiðistaðir eins og Hraun, Grófarkvörn, Kista, Símastrengur og Höfuðhylur en hann gefur oft bestu veiðina seint á kvöldin á þessum árstíma.

Fyrir ykkur sem eruð ekki búin að svala veiðiþörfinni í sumar þá er víða hægt að komast í fína veiði í haust.  Þú getur kíkt á einhverja af þessum síðum til að sjá hvað er í boði og það er nokkuð víst að það er hægt að finna veiðileyfi þarna fyrir alla. Skoðaðu síður eins og www.svfr.is, www.lax-a.is og www.veida.is.