Hálendisnefnd vill ræsið burt

Hálendisnefnd Rangárþings ytra vill að sveitarstjórnin sjá til þess að ræsi, sem Vegagerðin setti í Laugakvísl í Landmannalaugum í sumar, verði fjarlægt og umhverfið fært til fyrra horfs.

Hálendisnefndin segir ræsið alls ekki til bóta og vera lýti á umhverfinu. „Auk þess hefur það verið yfirlýst stefna sveitarfélagsins og stýrihóps um deiliskipulag í Landmannalaugum að ekki eigi að auka aðgengi inn á laugasvæðið. Jafnframt undrast nefndin að ekki skuli hafa verið leitað eftir leyfum til framkvæmdarinnar eins og lög gera ráð fyrir,“ segir í bókun. Byggðaráðið segir ljóst að ræsið víki strax í haust.