Njótið veðursins meðan þið getið

Blíðviðrið sem leikið hefur um íbúa höfuðborgarinnar undanfarna daga verður hvergi sjáanlegt um helgina. Því ætti fólk á sunnan- og vestanverðu landinu „að reyna að njóta veðursins sem er í boði er“ eins og veðurfræðingur hjá Veðurstofu Íslands orðar það.

Gert er ráð fyrir breytilegri átt, þremur til átta metrum á sekúndu en austan fimm til tíu metrum syðst. Yfirleitt léttskýjað eða bjartviðri, en víða þokuloft við ströndina norðan- og austanlands fram eftir degi. Þá má gera ráð fyrir hita á bilinu 8 gráðum og allt upp í 19 gráður, hlýjast í uppsveitum suðvestantil.

Á meðan verður yfirleitt þurrt á Norðausturlandi og „ágætt veður þar,“ að sögn veðurfræðings. Síðan er útlit fyrir að það snúist til norðlægrar átta og fari að rigna fyrir norðan og þá kólnar nokkuð hratt.

Veðurhorfur á landinu næstu daga

Á fimmtudag:

Austan 5-10 m/s með suðurströndinni, annars hæg breytileg átt. Sums staðar skýjað við sjávarsíðuna, en annars léttskýjað. Hiti 8 til 18 stig, hlýjast á V-landi, en svalast á Austfjörðum. 

Á föstudag:

Hæg breytileg átt og bjart með köflum A-til, en suðaustan 5-10 og dálítil væta V-lands. Hiti víða 10 til 16 stig. 

Á laugardag:

Suðaustan kaldi og rigning en yfirleitt þurrt NA-lands. Heldur svalara sunnan- og vestanlands. 

Á sunnudag:

Austlæg átt, heldur kólnandi veður og víða rigning með köflum. 

Á mánudag og þriðjudag:

Útlit fyrir norðlæga átt með rigningu og svölu veðri fyrir norðan, en lengst af þurrt og milt syðra.