Endurgerir klassíska Nike-skó

Hinn 36 ára Virgil Abloh ætlar í samstarfi við Nike að endurgera eða betrumbæta tíu týpur af Nike strigaskóm, bæði klassískum og nýjum. Virgil Abloh er listrænn stjórnandi og hönnuður vinsæla tískuhússins Off White, en komst fyrst fram á sjónarsviðið sem listrænn ráðgjafi Kanye West. Off White hefur á stuttum tíma orðið mjög áberandi í tískuheiminum. 

Nike skórnir sem Virgil mun endurgera eru þeir klassísku Air Jordan 1, Air Max 90, Air Max 97, Blazer, Hyperdunk og Air Force 1. Einnig á þessum lista eru nýrri týpur eins og AirVaporMax, Air Presto, Zoom VaporFly en einnig Converse Chuck Taylor All-Stars, sem eru framleiddir af Nike. 

Línan ber nafnið The Ten: Icons Reconstructed by Virgil Abloh, og kemur í búðir í Nóvember. Hins vegar munu nokkrar týpur koma í valdar Nike-búðir í September. 

Virgil er menntaður arkitekt, og þótti þetta verkefni mjög spennandi fyrir vikið, og hugsaði mikið um hvernig skórnir eru teknir í sundur og settir saman aftur. 

Mikið er um samstörf í tískuheiminum um þessar mundir, en við erum ekki frá því að þetta samstarf kemur með ferskan andblæ inn í haustið. 

Hér má sjá nánar um samstarfið.