Kaupir Jaguar Land Rover annað lúxusbílamerki?

Afar vel gengur hjá Jaguar Land Rover um þessar mundir og sem dæmi um það var 16% aukning í sölu við lok fjárhagsárs fyrirtækisins í lok mars síðastliðnum og markaði það metsöluár í sögu Jaguar Land Rover. Salan nam alls 604.000 bílum og varð 32% söluaukning í Kína og 24% aukning í Bandaríkjunum, 16% í Bretlandi og 13% í Evrópu allri.

Þessi góða sala hefur fært eiganda Jaguar Land Rover, Tata Group í Indlandi miklar tekjur og hefur Tata gefið Jaguar Land Rover leyfi til að kanna hugsanleg kaup á öðru lúxusbílamerki til að gefa fyrirtækinu tækifæri til að vera hæfara í samkeppninni við stærri lúxusbílamerki heimsins.

Er þá aðallega átt við þýsku bílamerkin Mercedes Bens, BMW, Audi og Porsche. Sem dæmi þá selur Mercedes Benz yfir 2 milljónir bíla á ári og er því meira en þrisvar sinnum stærra en Jaguar Land Rover. Stefna Jaguar Land Rover er að innan fárra ára verði sala þess að minnsta kosti helmingurinn af sölu Mercedes Benz og til þess að flýta þeim vexti kemur til álita að kaupa önnur lúxusbílamerki.

Hefur Alfa Romeo og Maserati verið nefnd í því sambandi. Hvort Fiat Chrysler sé tilbúið að selja Alfa Romeo og Maserati frá sér er hins vegar önnur saga, en þó hafa slíkar raddir heyrst á síðustu misserum. Helst hefur þó forstjóri Fiat Chrysler leitast eftir sameiningu alls fyrirtækisins við annað stórt bílamerki.