Grimmari Hilux í bígerð

Pallbíllinn Toyota Hilux selst eins og heitar lummur um allan heim, enda ódrepandi gæðabíll þar á ferð. Toyota býður hinsvegar ekki uppá mjög öfluga gerð gerð Hilux líkt og Ford gerir með 150 Raptor bíl sinn. Það gæti þó breyst á næstunni og er til mikillar skoðunar á heimavígstöðvum Toyota.

Toyota Hilux hefur hingað til fengist með takmörkuðu úrvali véla og aðeins einni gerð undirvagns. Ford F-150 Raptor er hinsvegar með miklu öflugri vél en í hefðbundnum Ford F-150 pallbíl, með mun öflugra fjöðrunarkerfi og aukabúnað og stendur auk þess hærra á vegi.

Toyota hefur ekki síst bílamarkaðinn í Ástralíu í huga varðandi grimmari Hilux, en hann ætti þó að eiga erindi í Bandaríkjunum og víðar fyrir þá sem kjósa mjög hæfan torfærubíl sem er þó minni en hinn stóri Ford F-150. Toyota metur stöðuna svo að markaður sé fyrir öllu grimmari Hilux sem viðbót við hinn hefðbundna.

Vonandi verða þessar hugmyndir að veruleika og að Hilux aðdáendum bjóðist bæði öflugri og enn betur búinn bíll sem endist jafn vel. Íslenskir eigendur Hilux bíla hafa margir hverjir leyst þennan skort á mjög torfæruhæfum Hilux með breytingum á honum og hefur Arctic Trucks gengið hvað lengst í að búa Hilux bílana meiri torfæruhæfni. Ef til vill ætti Toyota helst að leita í smiðju þeirra.