Alveg sama hvar vegurinn kemur, bara að þeir byrji

Bændur í Gufudalssveit eru opnir fyrir öðrum lausnum í stað vegar um Teigsskóg, bæði jarðgöngum og þverun Þorskafjarðar með sjávarfallavirkjun. Rætt var við heimafólk í Gufudalssveit í fréttum Stöðvar 2 og í þættinum „Um land allt“ á Stöð 2 í kvöld.

Þegar við hittum Skálanesbændur í heyskap á Melanesi í sumar var þeirra óskaleið að Vestfjarðavegur kæmi þvert yfir mynni Þorskafjarðar. 

„Við viljum fara niður af hálsunum. Það er aðalmálið,“ segir Andrea Björnsdóttir, þroskaþjálfi og bóndi á Skálanesi.

Þau á Skálanesi vilja að Vegagerðin taki höndum saman með fleiri aðilum um sjávarfallavirkjun. 

„Það er búið að reikna út að rafmagnið sem myndi fást úr þessari virkjun myndi duga fyrir notkun á öllum Vestfjörðum,“ segir  Sveinn Hallgrímsson, bóndi á Skálanesi.

Þau Styrmir Sæmundsson og Jóhanna Ösp Einarsdóttir í Fremri-Gufudal eru sama sinnis. 

„Ef við hefðum valið í upphafi hefðum við sennilega valið að fara frá Skálanesi og beint yfir á Reykjanes með tengingu inn á Reykhóla. Það er styst fyrir krakkana í skólann,“ segir Jóhanna Ösp, tómstundafulltrúi í Fremri-Gufudal. 

Láglendisvegur sé þó aðalatriðið. 

„Ég vil bara að þeir byrji. Mér er svona nokkuð sama hvar þeir fara, - bara að þeir byrji,“ segir Jóhanna. 

Mæðurnar ungu og systurnar í Fremri-Gufudal segjast vera á nálum að senda börnin í skólabílnum yfir Hjallaháls í skafrenningi og hálku. 

„Mér er alveg sama hvert vegurinn fer, - bara að það komi vegur sem fyrst,“ segir Hafrós Huld Einarsdóttir, bóndi í Fremri-Gufudal.

Bændum í Djúpadal líst best á jarðgöng undir Hjallaháls og veg um Ódrjúgsháls. 

„Nýta efnið úr göngunum til að þvera firðina. Minnsta umhverfisraskið og örugglega mesta framtíðin,“ segir Leifur Z. Samúelsson, bóndi í Djúpadal. 

Þau í Djúpadal segja að jarðgöng myndu stytta leiðir mest innan sveitarinnar. 

„Aftur á móti ef það kæmi vegur um Teigsskóg, þá lengist leiðin, eins og fyrir börnin okkar í skólann, bara töluvert. Við leyfum okkur náttúrlega bara að horfa á það líka,“ segir Guðrún Samúelsdóttir, bóndi í Djúpadal. 

Djúpadalsbændur telja vel hægt að leggja heilsársveg um Ódrjúgsháls. 

„Ódrjúgsháls er ekki nema 170 metra hár. Ég held að það sé ekki vandamál,“ segir Leifur.

„Láglendisvegur er náttúrlega skásti kosturinn. Maður á ekkert að vera að príla upp á fjöll ef það þarf ekki,“ segir Einar Hafliðason, bóndi í Fremri-Gufudal. 

„Ég er alveg á þeirri skoðun að það hefði átt að gera göng. Svo er náttúrlega sagt að það sé fjarstæða af því að það sé svo dýrt,“ segir Svandís Reynisdóttir, bóndi í Fremri-Gufudal. 

„Það er alltaf þras með Teigsskóginn, sko,“ segir Einar.

Þau Svandís og Einar rifja upp að þeim hafi í fyrstu ekkert litist á vegagerð um Skálanes og Klettsháls. Svo hafi vegirnir fallið vel inn í landslagið þegar búið var að ganga frá öllu. 

„Eins og í vestanverðum Klettshálsinum. Þetta var rosalegt þegar þeir voru að sprengja klettabeltin og ryðja burtu skóginum,“ segir Svandís. 

„Nú er skógurinn að byrja að vaxa upp í vegkantana. Það yrði eins með Teigsskóg,“ segir Einar. 

„Það þarf ekkert endilega að vera mikil náttúruspjöll,“ bætir Svandís við. 

„En við bara vonum að við fáum sem fyrst veg, hvar sem hann verður.“ 

Fjallað var um Gufudalssveit í þættinum „Um land allt“ á Stöð 2 í kvöld. 

Hér má sjá frétt Stöðvar 2: