Andar áfram af norðri

„Hann andar áfram af norðri í dag, víða gola eða kaldi, en strekkingur austast á landinu. Dálítil él norðaustantil, en víða léttskýjað annars staðar. Frost 2 til 12 stig,“ segir á heimasíðu Veðurstofunnar um veðrið í dag. Búist er við norðlægri átt, þrír til tíu metrar á sekúndu, en tíu til fimmtán metrar á sekúndu austast á landinu.

Spáð er hægviðri, að það verði léttskýjað og áfram kalt fram eftir morgundegi. Vaxandi suðaustanátt seinnipartinn á Suður- og Vesturlandi, þykknar upp og dregur úr frosti. 

„Á meðan við erum í rólegheitum í kalda loftinu á Íslandi stefna óveðurslægðirnar á Evrópu. Ein slík kemur af Atlantshafi inn á Biscayaflóa seint í dag og veldur stormi og úrhelli á Norður-Spáni og Portúgal í kvöld og nótt og einnig verður illviðri af hennar völdum í Frakklandi í fyrramálið. Áður en morgundagurinn er úti mun þessi djúpa lægð hafa valdið usla og tjóni í mörgum löndum Evrópu,“ segir á vef Veðurstofunnar.

Veðurhorfur á landinu næstu daga

Á þriðjudag:

Suðaustan 10-18 m/s og rigning eða slydda, en snjókoma til fjalla. Hiti 0 til 5 stig. Hægari vindur á N- og A-landi, úrkomulítið og minnkandi frost. Suðaustan 5-13 og skúrir eða él undir kvöld, en rigning SA-lands. Hiti kringum frostmark.

Á miðvikudag:

Snýst í norðaustan 8-13 m/s. Slydda eða rigning með köflum og snjókoma til landsins, en styttir upp á S- og V-landi. Víða frostlaust við ströndina, annars vægt frost.

Á fimmtudag:

Norðan 8-13 og él, en léttskýjað sunnan heiða. Frost 0 til 4 stig.

Á föstudag:

Fremur hæg norðlæg eða breytileg átt og bjartviðri, en él við NA-ströndina. Talsvert frost.

Á laugardag:

Líkur á suðaustanátt með úrkomu og hlýnandi veðri.