Þrír eru enn í lífshættu eftir rútuslysið í Eldhrauni í gær en það er það umfangsmesta sem hefur orðið á Suðurlandi á þessari öld. Svæðisstjóri hópferðafyrirtækisins sem á rútuna segir hana hafa verið vel búna til vetraraksturs og uppfyllt öll öryggisskilyrði.
Þjóðvegurinn um Eldhraun skammt vestan Kirkjubæjarklausturs var opnaður aftur á níunda tímanum í gærkvöldi þegar búið var að ná rútunni sem valt með um 50 kínverskar ferðamenn í gærmorgun, upp á veg aftur og rannsókn var lokið á vettvangi.
Fjörutíu og fjórir farþegar auk bílstjóra og leiðsögumanns voru í rútunni og hefur fréttastofan upplýsingar um að minnsta kosti sex farþeganna hafi kastast út þegar rútan valt og tveir þeirra hafi lent undir henni.
Kona á þrítugsaldri var úrskurðuð látin á vettvangi en 12 voru fluttir með tveimur þyrlum Landhelgisgæslunnar á slysadeild Landspítalans í Fossvogi. Fimm þeirra þurftu á gjörgæslumeðferð að halda. Í dag eru þrír enn á gjörgæslu, sjö liggja á bráðalegudeild og tveir voru útskrifaðir af spítalanum í gær.
Hinir þrjátíu og sex sem voru minna eða ekkert slasaðir voru fluttir fyrst á fjöldahjálparstöð á Klaustri og svo á Heilbrigðisstofnun Suðurlands á Selfossi.
Um 300 manns komu að björgunaraðgerðum í gær á einn eða annan hátt og þá eru ekki taldir með þeir almennu borgarar sem hlúðu að hinum slösuðu meðan keðja viðbragðsaðila kom á vettvang sem var nær óslitin frá Hveragerði.
Svæðisstjóri Hópferðabíla Akureyrar sem á rútuna segir það hafa verið mikið áfall þegar upplýsingar um slysið fóru að berast.
„Við fengum mjög óljósar fréttir af þessu í fyrstu og töldum bara að um árekstur væri að ræða en fréttum síðar bíllinn væri á hliðinni og þá fór okkar starf bara algjörlega í þetta,“ segir Vignir Þór Siggeirsson, svæðisstjóri hjá Hópferðabílum Akureyrar.
Vignir segir rútuna hafa verið vel búna til vetraraksturs en hún var í dagsferð með ferðamennina um Suðurland.
„Hún var með neglda hljóðbarða, nýlegir og belti í öllum sætum,“ segir Vignir.
Í kjölfar slyssins í gær hafa spottið upp umræður á samfélagsmiðlum um sætisbeltanotkun farþega í hópferðabifreiðum. Vignir segir bílstjóra fyrirtækisins fylgja því eftir að farþegar spenni beltin áður en haldið er af stað.
„Eftir að bílstjóri er farinn á ferð, þá hefur hann enga möguleika á að vita hvort fólk sé að losa sig úr beltum eða svoleiðis. Þannig að við brýnum þetta mjög fyrir erlendum hópstjórum að allir séu í beltum,“ segir Vignir.
Vitið þið hversu margir voru án belta í gær?
„Nei, það er ómöguleg að segja,“ segir Vignir.
Oddur Árnason yfirlögregluþjónn á Suðurlandi segir að rannsókn beinist meðal annars að ökuhraða rútunnar áður en hún valt en áður ók hún aftan á fólksbíl í sömu akstursstefnu, sem hugðist beygja til hægri út af veginum.
Vignir segir bílstjórann í gær ekki hafa verið undir neinni tímapressu.
Slysið í gær er það umfangsmesta á Suðurlandi á þessari öld.
Forsvarsmenn Hópferðabíla Akureyrar vilja koma á framfæri þökkum til allra viðbragðsaðila og til annara hópferðabílstjóra sem unnu að björgunarstarfi í gær og segja hug sinn hjá fjölskyldu konunnar sem lést og hjá bílstjóranum og fjölskyldu hans.
