Björgunarsveitir Landsbjargar hafa haft í nógu að snúast í óveðrinu sem gengið hefur yfir suðvesturhorn landsins í morgun. Nánast allar sveitir á höfuðborgarsvæðinu hafa verið kallaðar út vegna veðursins.
Að sögn Davíðs Más Bjarnasonar, upplýsingafulltrúa Landsbjargar, eru sextíu björgunarsveitarmenn í verkefnum núna en upp úr klukkan tvö í nótt byrjuðu þakplötur að fjúka bæði í Grindavík og Reykjanesbæ.
Fyrstu útköllin á höfuðborgarsvæðinu bárust svo um sexleytið í morgun og hafa björgunarsveitirnar farið í rúmlega þrjátíu verkefni.
„Þetta eru hefðbundin óveðursverkefni þar sem lausamunir og þakplötur eru að fjúka. Þetta er helst í efri byggðum, bæði í Kópavogi og Reykjavík, og á Völlunum í Hafnarfirði,“ segir Davíð Már í samtali við Vísi.
Aðspurður hvort einhver trampólín hafi farið af stað segir hann að sér sé ekki kunnugt um það. Björgunarsveitirnar verða að störfum á meðan þurfa þykir en veðrið náði hámarki upp úr klukkan átta í morgun og verður að mestu gengið niður í hádeginu í dag.
Tugir björgunarsveitarmanna í óveðursverkefnum á höfuðborgarsvæðinu
Tengdar fréttir
Heitur pottur fauk af 13. hæð húss og hafnaði á leikskólalóð í Kópavogi
Aðstoðarleikskólastjóri segir starfsfólk hafa verið mjög hissa þegar það sá hvað hafði gerst þegar það mætti til vinnu í morgun.
Lægðirnar koma á færibandi í vikunni
Óveðrið sem nú gengur yfir höfuðborgarsvæðið náði hámarki upp úr klukkan 8 í morgun að sögn Árna Sigurðssonar, veðurfræðings á Veðurstofu Íslands.
