Segist þegar hafa axlað pólitíska ábyrgð

Skipun dómara í Landsrétt var ekki í samræmi við ráðleggingar sérfræðinga innan stjórnsýslunnar. Þannig var Sigríður Andersen dómsmálaráðherra vöruð við því að víkja frá niðurstöðu hæfisnefndar án þess að leggja sjálfstætt mat á umsækjendur. Ráðherrann segir þessar upplýsingar hins vegar engu breyta um málið.

Líkt og fram hefur komið samþykkti Alþingi í júní 2017 tillögu dómsmálaráðherra um þá fimmtán einstaklinga sem taka skyldu sæti við Landsrétt. Í fjórum tilfellum var vikið frá niðurstöðu hæfisnefndar og aðrir skipaðir en þeir sem metnir höfðu verið hæfastir.

Af þessu leiðir að fjórir þeirra sem voru í hópi fimmtán hæfustu fengu ekki dómarasæti, en tveimur þeirra hafa þegar verið dæmdar bætur frá ríkinu og krefjast hinir tveir enn fremur bóta.

Stundin birti í dag gögn úr dómsmálaráðuneytinu þar sem m.a. er að finna tölvupóstsamskipti milli lögfræðinga úr nokkrum ráðuneytum auk athugasemda sem sérfræðingar gerðu við bréf Sigríðar Andersen dómsmálaráðherra til Alþingis vegna skipunar í Landsrétt. Í einu bréfanna segir lögfræðingur m.a. að ef ráðherra ætli að leggja tillögu fyrir þingið þar sem vikið sé frá niðurstöðu hæfisnefndar þurfi að leggja sjálfstætt mat á alla umsækjendur.

Í sama streng tekur Snædís Ósk Sigurjónsdóttir, lögfræðingur í dómsmálaráðuneytinu, en í athugasemdum við bréf Sigríðar til Alþingis segir hún m.a. „Það þarf að rökstyðja hverjir eru hæfastir ef ætlunin er að breyta. Hér þarf að hafa í huga að lögbundin nefnd sem á að meta hæfnina er búin að skila áliti sínu.“ Ekki náðist í viðkomandi sérfræðinga til viðtals í dag, en ráðherra segir gögnin litlu breyta um stöðuna.

„Mér var fullkunnugt um þetta og ræddi við þessa starfsmenn og aðra sérfræðinga þessi álitaefni og ég ræddi það líka við stjórnskipunar- og eftirlitsnefnd síðasta sumar með hvaða hætti ég hefði innt þessa rannsóknarskyldu af hendi. Það var bara mitt mat á þessum tíma að henni væri fullnægt svona,“ segir dómsmálaráðherra.

Vísar Sigríður meðal annars til þess að Alþingi hafi tekið þátt í afgreiðslu málsins, auk þess sem hún hafi haft skamman tíma til að taka ákvörðun. Í dómum sínum frá því í desember sagði Hæstiréttur m.a. að ráðherra hafi ekki sinnt rannsóknarskyldu sinni nægilega og væri ríkið því skaðabótaskylt. Ljóst er því að ákvörðunin kostar ríkissjóð talsverða fjármuni.

Það mun auðvitað talsverður kostnaður falla á ríkið vegna þessarar skipunar.

Sérðu fyrir þér að axla einhverja frekari pólitíska ábyrgð, segja af þér?

„Ég hef náttúrulega bara gengið í gegnum kosningar og þannig er hin pólitíska ábyrgð og ég leiddi þann lista sem fékk nú næstflest atkvæði á landinu í síðustu kosningum. Þessi mál voru öll komin upp þá og héraðsdómur hafði nú fallið þá.“