Fordæmir Kastljósviðtalið við Sigmund Davíð

„Ég er mikill Sigmundar-maður,“ segir Sigurður Þ. Ragnarsson jarð- og veðurfræðingur í samtali við Vísi. Sigurð þekkja landsmenn væntanlega betur sem Sigga Storm, veðurfræðinginn sem naut svo mikilla vinsælda fyrir nokkrum árum.

Nýverið var stofnuð sérstök deild Miðflokksins í Hafnarfirði. Siggi var kosinn formaður. Hann fer hvergi leynt með aðdáun sína á formanni Miðflokksins, Sigmundi Davíð Gunnlaugssyni. Siggi lýsir því að hann hafi verið Sjálfstæðismaður og gegndi trúnaðarstörfum fyrir þann flokk. En, hann var ekki sáttur. Honum leist engan veginn á þróun mála þar innan veggja, segist hafa verið orðinn áttavilltur eða allt þar til Sigmundur Davíð kom fram á sjónarsviðið.

„Mér finnst Sigmundur afburðastjórnmálamaður. Hann hefur sýnt það með verkum sínum og hann er fylginn sér.“

Þú ert þá væntanlega í þeim hópi sem telur hann hafa verið grátt leikinn í tengslum við Wintrismálið sem svo leiddi til þess að hann hrökklaðist úr sæti forsætisráðherra?

„Grátt leikinn? Ömurlega. Maðurinn hefur engin lög brotið. Það hljóta að vera takmörk,“ segir Siggi sem segist ekki vilja rifja það mál allt upp.

En, það var farið illa með hann í hinu fræga Kastljósviðtali, sem ég fordæmi, ég fordæmi þau vinnubrögð að fá menn í viðtal á fölskum forsendum. Þetta er svo ljótt.“

Sigurður á hreinlega erfitt að finna orð til að lýsa því hvernig farið var með hans mann.

„Það er ekki verið að tala um að ritskoða neitt heldur vildi hann koma undirbúinn til að svara því sem um var spurt. Sorglegt fyrir blaðamannastéttina að hafa horft uppá þetta. En, hún gengur stundum langt. Reynir að vera á línunni en þarna fór hún yfir hana. Jóhannes Kr. Kristjánsson, sem ég þekki ágætlega, féll niður í núll hjá mér við þetta.“

Miðflokkurinn mættur í Fjörðinn

En, svo tekið sé upp léttara hjal þá segir Sigurður að flokkurinn sé ekki bara Sigmundur.

„Þarna er fjöldinn allur af fólki; á annað hundrað manns í Fjörukránni á Þorrablóti á vegum Miðflokksins. Rétt dugði neðri hæðin. Ótrúleg stemmning í gangi. Þetta er svo kraftmikið fólk en maður verður bara feiminn,“ segir Siggi. Og telur frjóan svörð í Hafnarfirði fyrir Miðflokkinn.

Stofnun Hafnarfjarðardeildarinnar er liður í undirbúningi Miðflokksins fyrir komandi sveitarstjórnarkosningar en Miðflokkurinn stefnir að því að fara fram í öllum helstu kjördæmum.

Sigurður er til þess að gera nýkominn frá Spáni hvar hann á hús, hann reynir að vera sem mest úti á Spáni. En, hann segist sposkur ekki vera kominn á ellilífeyrisaldur og því verði hann að koma til Íslands og sækja sér verkefni.

„Gott veður eru ákveðin lífsgæði. Að þurfa ekki að loka sig inni bak við gardínur og fjasa yfir vondu veðri og myrkri. Mér líður aldrei vel í þessu myrkri. Þeir fara ekkert vel í mig þessir dimmustu mánuðir og vond veður. Hellist yfir mig skammdegisdrungi og ég verð þreyttur.“

Veðurfræðingar ljúga

Þetta er alveg nýtt frá veðurfræðingi, sem alltaf eru jafn hressir á skjánum sama hvernig veður er? Þeir hlæja að veðrinu?

„Já,“ segir Siggi og helst á honum að skilja að veðurfræðingar séu ekki allir þar sem þeir eru séðir. Og jafnvel að það sé rétt sem Bógómíl Font söng hér um árið, að þeir ljúgi.

„Páll Bergþórsson kenndi mér það að maður ætti alltaf að peppa fólkið upp, en það er hægt að leika leikrit í sjónvarpi þó annað liggi að baki.“