Hlánar við ströndina og vegum lokað

Veður er orðið afar slæmt á Suður- og Vesturlandi og mun ekki lægja svo teljanlegt sé fyrr en í fyrramálið. Hellisheiði, auk fleiri vega, hefur verið lokað vegna veðurs og mun lokunin gilda þangað til á morgun. Þá á að hlána töluvert í nótt á sunnan- og vestanverðu landinu, þó ekki á Vestfjörðum þar sem áfram mun snjóa.

„Það á smátt og smátt að hlýna þannig að þegar líður á nóttina þá breytist úrkoman í slyddu eða rigningu, þá skánar skyggnið en blotnar auðvitað í snjónum,“ segir Óli Þór Árnason, vakthafandi veðurfræðingur hjá Veðurstofu Íslands í samtali við Vísi í kvöld. „Hvort að það er eitthvað betra er ég ekkert endilega viss um,“ bætir hann við.

Þá er færð víða mjög slæm en búið er að loka Hellisheiði, Þrengslum, Mosfellsheiði og Kjalarnesi, að því er fram kemur á vef Vegagerðarinnar. Staðan verður ekki uppfærð fyrr en klukkan 6:30 í fyrramálið, segir jafnframt á vefnum.

Fer aftur undir frostmark á morgun

Aftur mun kólna í veðri strax á morgun og búist er við éljagangi fram eftir viku.

„Skilin ganga yfir seinnipartinn í nótt og hérna fyrir höfuðborgarsvæðið verður það í kringum sexleytið. Þá skiptir um gír og lægir töluvert, úrkoman verður ekki svona samfelld en á móti kemur að þá kólnar niður undir frostmark aftur,“ segir Óli Þór.

„Þá verður éljagangur og sá verður viðvarandi alveg fram á föstudag.“

Veðurhorfur á landinu næstu daga:

Á fimmtudag:

Suðvestan 8-15 m/s og éljagangur, en bjartviðri eystra. Frost 0 til 10 stig, minnst með S- og A-ströndinni.

Á föstudag:

Suðvestlæg átt, allhvöss syðst, en annars hægari. Víða él, einkum V-til, en snýst í vaxandi austanátt S-lands um kvöldið og fer að snjóa þar. Frost um land allt. 

Á laugardag:

Gengur líklega í allhvassa eða hvassa norðaustlæga átt með snjókomu eða éjagangi, einkum við N-ströndina. Dregur úr frosti í bili.

Á sunnudag, mánudag og þriðjudag:

Útlit fyrir órólegt og kalt veður með úrkomu í öllum landshlutum.