Sigurður situr nú í gæsluvarðhaldi grunaður um aðild að umfangsmiklu fíkniefnasmygli frá Spáni til Íslands. Samkvæmt heimildum fréttastofu Stöðvar 2 er Sunna Elvira grunuð um aðild að málinu en neitar þó allri vitneskju.
Mál Sunnu hefur vakið mikla athygli undanfarnar vikur frá því hún féll niður af svölum á heimili sínu og Sigurðar á Málaga á Spáni þann 17. janúar síðastliðinn. Hún hlaut mænuskaða í slysinu og er lömuð fyrir neðan brjóst.
Sparkaði gat á hurð og kveikti í anddyri húss
Brot Sigurðar fólst í því að hann hafi í júlí árið 2003 sparkað gat á útidyrahurð á einbýlishúsi í Laugardal, hellt tíu lítrum af bensíni í anddyri hússins, á tröppur og á útveggi hússins og kveikt í því svo eldur blossaði upp. Þrír íbúar voru í húsinu og taldi héraðsdómur að Sigurður og tveir aðrir menn sem einnig voru ákærðir í málinu hafi með þessi stofnað lífi þeirra í hættu.Sigurður var í héraðsdómi dæmdur í tveggja ára óskilorðsbundið fangelsi en dómurinn var staðfestur í Hæstarétti.
Sigurður játaði brot sitt í meginatriðum en neitaði því þó að hafa hellt bensíni yfir umrædda hluta hússins. Hann sagði að hann hafi farið að húsinu í Laugardal til þess að hræða húsráðanda vegna þess að húsráðandinn hafi nokkru áður skotið á hann og hina ákærðu mennina úr haglabyssu.
Sigurður og vitorðsmenn hans voru allir undir áhrifum áfengis og amfetamíns þegar þeir brutu af sér.
Sambýliskona húsráðandans sagði fyrir dómi að hún hafi orðið fyrir heilsutjóni vegna atviksins og að hún hafi átt við geðrænar raskanir að stríða vegna þess og að hún hafi sýnt einkenni áfallastreitu í kjölfar þess. Hún lá í um tíu daga á geðdeild eftir atvikið.
Fékk uppreist æru fyrir fimm árum
Sigurður sótti um uppreist æru í byrjun september 2013 og var umsókn hans samþykkt síðar í sama mánuði.Í umsókn hans segir að frá árinu 2007 hafi Sigurður stýrt og verið í forsvari fyrir þrjú byggingaverktakafyrirtæki og að sá rekstur hafi skilað mikilli velgengni enda hafi hann og samstarfsfélagar hans innt af hendi mörg verkefni, þar á meðal í samvinnu við Reykjavíkurborg.
Sigurður átti meðal annars félagið SS hús ehf. en félagið var tekið til gjaldþrotaskipta 10. janúar síðastliðinn. Fréttablaðið greindi frá því á dögunum að grunur leiki á um stórfelld undanskot eigna og þjófnaði úr félaginu og að undanskot eigna og óútskýrðar millifærslur af reikningum félagsins hlaupa á hundruðum milljóna króna. Þá er félagið einnig til rannsóknar hjá skattyfirvöldum, meðal annars vegna mikilla vanskila á vörslusköttum.
„Umsækjandi hefur allt frá því hann lauk afplánun verið löghlýðinn þjóðfélagsþegn og ráðsettur tveggja barna faðir í sambúð,“ segir að lokum í bréfi Sigurðar.
Tolli Morthens sagði Sigurð vera „fyrirmyndar samborgara“
Tvö meðmælabréf fylgdu umsókn Sigurðar um uppreist æru, annað frá listamanninum Þorláki Morthens, betur þekktur sem Tolli, og hitt frá Pétri Blöndal Gíslasyni.Í meðmælabréfi Tolla segir að hann og Sigurður hafi átt „samleið á lífsins vegi“ frá árinu 2007. „Er mér það sönn ánægja að geta vottað það að þar er á ferðinni traustur, áreiðanlegur og góður maður,“ segir í bréfi Tolla.
Sigurður og Tolli höfðu þá tekið þátt í uppbyggingu sjálfshjálparstarfs innan fangelsa á Íslandi. „Í stuttu máli leyfi ég mér af einlægni að fullyrða að í Sigurði er að finna það sem að maður getur kallað „fyrirmyndar samborgari““, segir Tolli í bréfi sínu.
Tolli Morthens rataði í fréttir á síðasta ári, þegar umfjöllun um uppreist æru kynferðisbrotamanna stóð sem hæst, en hann hafði einnig veitt öðrum manni meðmælabréf af þessum toga. Sá maður hafði hlotið fangelsisdóm árið 1998 þar sem hann var fundinn sekur um nauðgun. Tolli sagði í bréfi sínu varðandi þann mann að hann væri „traustur samborgari“.
Margdæmdur maður vottaði Sigurði góða hegðun
Hitt meðmælabréfið er frá Pétri Blöndal Gíslasyni, starfsmanni Hveravalla, en þeir höfðu leitt saman betrunarstarf á Litla Hrauni. „Sigurður Kristinsson hefur þar verið ómetanlegur liðsauki og sá kraftur sem honum fylgir eftir að hann snéri við sínu blaði hefur verið innblástur fyrir marga,“ segir í bréfi Péturs.Pétur segir í bréfi sínu að hann hafi sjálfur snúið við blaðinu árið 1983 en hann var fjórum sinnum dæmdur í fangelsi fyrir þann tíma, meðal annars vegna fíkniefnamisferlis. „Ég leyfi mér að fullyrða að Sigurður er staddur á allt öðrum stað með líf sitt en fyrir sjö árum síðan þegar hann umsnéri lífi sínu,“ segir Pétur í bréfinu.
