Óvissustigi lýst yfir á Suðvesturlandi

Vegagerðin hefur lýst yfir óvissustigi á þremur vegum suðvestanlands, Sandskeiði, Hellisheiði og í Þrengslum.

Veður mun versna þegar líður á kvöldið en búist er við suðaustan 15-25 m/s í kvöld, að því er fram kemur á vef Veðurstofu Íslands. Þá verður hvassast syðst á landinu og rigning eða slydda á láglendi en snjókoma á heiðum fram eftir kvöldi. Búist er við snörpum vindhviðum á Kjalarnesi, undir Hafnarfjalli og undir Eyjafjöllum, allt að 35 m/s og er miðað við að mesta hvassviðrið verði frá 19 í kvöld til 2 í nótt.

Færð er auk þess víða slæm á landinu, hálkublettir eru á höfuðborgarsvæðinu og víða á Reykjanesi. Þá er snjóþekja og skafreningur á Hellisheiði og í Þrengslum, þar sem óvissustigi hefur verið lýst yfir eins og áður sagði. Fylgjast má með færð á vegum landsins á vef Vegagerðarinnar.

Þá eru íbúar á Suðvesturlandi enn beðnir að huga að því að rigningar- og leysingarvatn komist sína leið í fráveitukerfi til að fyrirbyggja vatnstjón en óveðri kvöldsins fylgja aukin hlýindi og hláka. Spár gera auk þess enn ráð fyrir suðaustan hvassviðri eða stormi í kvöld á Suður- og Vesturlandi.

Gul viðvörun Veðurstofunnar er ennig enn í gildi um allt land. Teitur Arason, veðurfræðingur á Veðurstofu Íslands, sagði í samtali við fréttastofu fyrr í dag að lægð sé nú að nálgast landið með tilheyrandi vetrarstormi. Þá kann að vera að flugsamgöngur fari úr skorðum í kvöld og eru ferðalangar hvattir til að fylgjast vel með hugsanlegum töfum.