Refsivert að sinna ekki tilkynningarskyldu barnaverndarlaga

Á blaðamannafundi lögreglu í gær voru niðurstöður innri skoðunar lögreglu á verkferlum sínum í máli barnaverndarstarfsmanns kynntar. Þar kom fram að aðkoma stjórnenda deildarinnar hafi verið ómarkviss, ábyrgð óljós og ekki eðlilegt aðhald til staðar.

Lögreglustjóri sagði þó ekki tilefni til að stjórnendur verði látnir sæta ábyrgð.

„Það er ekki okkar niðurstaða að það sé ástæða til þess. Við sjáum ekkert saknæmt og við erum fyrst og fremst að tryggja að þetta gerist ekki aftur," sagði Sigríður Björk á blaðamannafundinum og benti á að formleg rannsókn á málinu sé í höndum nefndar um eftirlit með lögreglu.

Þórhildur Sunna Ævarsdóttir, þingmaður Pírata, bendir aftur á móti á að í barnaverndarlögum sé kveðið sérstaklega á um tilkynningaskyldu lögreglu til barnaverndaryfirvalda, til dæmis ef barn býr við ofbeldi eða vanvirðandi aðstæður. Ef það sé látið hjá líða þá varði það sektum eða fangelsi allt að tveimur árum.

„Og þetta er greinilega látið hjá líða ítrekað og við þessu er refsiákævði í barnaverndarlögum. Mér finnst óábyrgt að halda því fram að ekkert saknæmt hafi átt sér stað áður en raunveruleg rannsókn hefur átt sér stað í þessu máli,“ segir Þórhildur Sunna.

Dómsmálaráðherra ítrekar að eingöngu innanhússskoðun hafi farið fram - sú skoðun sýni að ekki sé um saknæma háttsemi að ræða, heldur gáleysi.

„Við verðum að hafa í huga að þarna starfar fólk og það geta orðið mistök. Ég held það sé brýnna að menn taki á þessu með uppbyggilegum hætti,“ segir Sigríður Á. Andersen.

Lögregla hóf innri skoðun á verkferlum sínum í málinu að eigin frumkvæði. Enginn óháður aðili hefur gert rannsókn á málinu en á næstu dögum mun nefnd um eftirlit með lögreglu taka málið til skoðunar.

Nefndin er sjálfstæð og óháð stjórnsýslunefnd og var sett á fót fyrir ári síðan. Þangað geta borgarar leitað með athugasemdir eða kvartanir vegna starfa lögreglu. En einnig hefur nefndin heimild til að taka verklag lögreglu til skoðunar að eigin frumkvæði.

Lögreglustjóri hefur sent öll gögn til nefndarinnar og segir Trausti Fannar Valsson, formaður nefndarinnar, að gögnin verði skoðuð, verkferli metin og athugasemdum komið áfram til lögreglustjóra, eða til ríkissaksóknara eða ráðuneytis ef tilefni þykir til.

„Við getum ekki ákveðið hvort niðurstaða máls verði ákæra eða ekki, við getum ekki ákveðið hvort niðurstaða máls verði áminning til lögreglumanns eða ekki. Það er alltaf hlutverk annarra í kerfinu en við fylgjumst með að málið fari í farveg og að því ljúki,“ segir Trausti Fannar.