Kviknaði í snekkju við báta­bryggjuna í Reykja­vík

Slökkvilið höfuðborgarsvæðisins fékk tvö útköll í Vesturbæ Reykjavíkur með nokkurra mínútna millibili upp úr klukkan 10:30 í morgun.

Samkvæmt upplýsingum frá varðstjóra kom fyrst útkall um eld í snekkju við bátabryggjuna hjá Sjóminjasafninu. Skömmu síðar kom útkall um eld í íbúð á Ránargötu. Var þá stöðin sem fór niður að bryggju send á Ránargötu og allt tiltækt lið kallað út.

Bílar frá slökkvistöðvunum í Mosfellsbæ og Hafnarfirði voru sendar að bátnum en þegar í ljós kom að um minniháttar atvik var að ræða á Ránargötu var dregið úr viðbragðinu.

Þar var pottur á eldavél og hafði verið tilkynnt um eld en að sögn varðstjóra var ekki um eld að ræða heldur reyk og vonda lykt. Er nú unnið að því að reykræsta íbúðina.

Þá er jafnframt búið að slökkva eldinn í snekkjunni og verið að ræsta hann og skola burt verksummerki.

Fréttin var uppfærð klukkan 11:11.