Illviðri í borginni í fyrramálið: Líkur á að samgöngur fari úr skorðum

Varað er við veðurhvelli sem spáð er að gangi hratt yfir landið í fyrramálið. Er gert ráð fyrir að að veðrið gangi yfir suðvestanlands á milli klukkan 07 – 10 á morgun með allt að 23 til 28 metrum á sekúndu með snjókomu og slæmu skyggni í efri byggðum og austur frá Reykjavík.

Hviður verða allt að fjörutíu metrar á sekúndu á Reykjanesbraut um klukkan 8 átta á morgun og fram yfir klukkan 10 á Kjalarnesi og undir Hafnarfjalli. Veðurstofa Íslands segir að illviðri verði í höfuðborginni snemma á morgun þar sem hvassast verður í efri byggðum og á Kjalarnesi. Snjókoma í fyrstu, en síðan slydda og rigning.

Eru líkur á að það verði ansi blint og hætta á foktjóni. Þá er einnig talið líklegt að samgöngur innan borgarmarkanna fari úr skorðum á meðan veðrið gengur yfir. Mun þessi lægð hafa áhrif á allt landið og eru fólk beðið um að hafa varan á í fyrramálið og fram eftir degi með því að fylgjast vel með veðurspám og færð á vegum. 

Hefur Veðurstofa Íslands gefið út appelsínugula viðvörun fyrir Suðurland, Faxaflóa, Breiðafjörð, Strandir og norðurland vestra. Gul viðvörun gildir fyrir höfuðborgarsvæðið, Norðurland eystra, Austurland að Glettingi, Austfirði og Suðausturland.

Kærkomin stund verður á milli lægða á fimmtudag en næsta illviðrislægð er væntanleg á föstudag.

Horfur á öllu landinu næsta sólarhringinn: 

Suðvestlæg átt, víða 8-15 metrar á sekúndu og él, en léttskýjað norðaustantil. Hiti nálægt frostmarki, en kólnar í kvöld. Ört vaxandi suðaustanátt í nótt og hlýnar, 20-30 metrar á sekúndu í fyrramálið, hvassast um landið vestanvert. Snjókoma í fyrstu, en síðan slydda og rigning, mikil um landið suðaustanvert. Úrkomulítið norðaustantil. Dregur ört úr vindi og úrkomu upp úr hádegi, en áfram stormur austanlands fram á kvöld og mikil rigning suðaustantil. Hiti víða 2 til 7 stig.

Veðurhorfur á landinu næstu daga

Á fimmtudag:

Sunnan og suðvestan 13-18 m/s og él, en heldur hægara og léttskýjað NA-til. Frost yfirleitt 0 til 5 stig.

Á föstudag:

Gengur suðaustanstorm eða -rok með talsverðri eða mikilli rigningu eða slyddu, en mun úrkomuminna fyrir norðan. Hiti 2 til 7 stig síðdegis.

Á laugardag:

Sunnanhvassviðri eða -stormur framan af degi, en dregur síðan talsvert úr vindi. Rigning eða slydda, en þurrt að kalla nyrðra. Kólnar heldur í veðri.

Á sunnudag:

Suðlæg átt og dálítil slydda eða rigning á A-verðu landinu, en annars hægviðri og þurrt. Hlýnar smám saman í veðri.

Á mánudag:

Útlit fyrir milda suðaustanátt með smá vætu um landið S- og V-vert, en bjartviðri fyrir norðan.