Skipaður verjandi Sindra segir handtökuna hafa verið afar einkennilega

Skipaður verjandi Sindra Þór Stefánssonar í Hollandi gagnrýndi handtökuna á Sindra í Amsterdam sem varð til þess að dómarinn í málinu ákvað að óska eftir frekari gögnum í málinu til að geta tekið ákvörðun hvort hann myndi úrskurða Sindra í gæsluvarðhald.

Sindri Þór var handtekinn í miðborg Amsterdam síðastliðið sunnudagskvöld eftir að lögreglu hafði borist ábending um hann frá vegfaranda.

Var Sindri leiddur fyrir dómara í Héraðsdómi Amsterdam síðdegis í gær þar sem dómarinn ákvað að úrskurða Sindra Þór í sólarhrings gæsluvarðhald svo dómarinn fengi tíma til að fá gögn frá saksóknara er varða handtöku Sindra og á hvaða lagalegu forsendu hún var framkvæmd.

Vill meina að ákvörðun dómara hafi verið óvenjuleg

Michiel Kuyp er skipaður verjandi Sindra í Hollandi. Hann segir það afar óvenjulegt, í málum þar sem dómari ákveður hvort einhver eigi að sæta gæsluvarðhaldi, að dómari skipi saksóknara að afla frekari gagna um handtökuna.

„Venjulega í svona málum ákveður dómarinn um leið hvort einhver verði hnepptur í gæsluvarðhald eða ekki, í þessu máli sagði dómarinn að verjandinn hefði nokkuð til síns máls og afla þyrfti frekari gagna um handtökuna og á hvaða lagalegum grundvelli hún var framkvæmd,“ segir Kuyp í samtali við Vísi.

Hann segist hafa gagnrýnt að það virðist ekki hafa legið fyrir á hvaða lagalegu forsendu Sindri var handtekinn.

„Hann var handtekinn vegna evrópskrar handtökuskipunar en Ísland er ekki hluti af því ferli. Það var eitt af meginatriðunum,“ segir Kuyp.

Segir ekki á hreinu hvað vitnið vissi

Þá vill hann meina að ekki sé á hreinu hvað vitnið, sem benti lögreglu á Sindra, vissi á þeim tímapunkti sem það ræddi við lögregluna. Hann segir það hafa vakið athygli sína þegar hann las gögnin að lögregla virtist hafa mun meiri upplýsingar um Sindra en vitnið virðist hafa gefið upp.

„Það skiptir ekki máli en það vakti athygli mína þegar ég sá gögnin. Það var frekar skrýtið og ég nefndi það líka. Það voru nokkur önnur atriði sem voru skringileg varðandi þetta mál. Samblanda af því varð þess valdandi að dómarinn ákvað að taka sér frest í gær.“

Grunar aðkomu íslenskra lögreglumanna

Kuyp segist gruna að lögreglumenn á Íslandi hafi eitthvað haft með handtöku Sindra að gera í Amsterdam, sem væri ólöglegt ef rétt reynist.

„Ég hef engar sannanir fyrir því en það gæti vel verið. Ég reyndi ekki að finna sannanir fyrir því, því það skiptir ekki máli fyrir mál hans hér í Hollandi. Hollenski dómarinn var einungis að velta fyrir hvort framselja á Sindra eða ekki,“ segir Kuyp.

Spurður hvort að Sindri sjálfur haldi því fram að lögreglumenn frá Íslandi hafi elt hann til Amsterdam segist Kuyp ekki vita það. Sindri hafi ekki haldið þessu fram við hann, heldur hafi þessi grunur Kyup vaknað við lestur gagna málsins.

Finnst óvenjulegt hve fljótt Sindri fannst

Hann vill meina að handtakan hafi verið einkennileg. „Hún var fremur snögg, og það er eitt af því sem er einkennilegt. Það voru aðrir hlutir sem voru einnig einkennilegir, en þeir eru bundnir trúnaði,“ segir Kuyp.

Hann segir það afar óvenjulegt hversu fljótt lögreglumennirnir fundu Sindra eftir að vitni hafði gefið upplýsingar um hann. Samkvæmt upplýsingum frá lögreglu gekk vitnið inn á lögreglustöð í Amsterdam um klukkan sjö síðastliðið sunnudagskvöld. Sagðist vitnið hafa séð Sindra í miðborg Amsterdam og fóru tveir lögreglumenn að leita hans. Um klukkustund síðar höfðu þeir fundið Sindra í götunni Damrak.

Kuyp segir Amsterdam afar fjölmenna og þéttbýla borg. Um 813 þúsund manns búa í Amsterdam en um 4.900 manns eru á hvern ferkílómetra borgarinnar.

Vill hann því meina að það sé frekar óvenjulegt að lögreglumennirnir tveir hafi verið svo lánsamir að finna Sindra svo fljótt eftir að vitnið hafði bent á hann.

Sagðist ekki hafa reynt að fela sig

Dómarinn tók sér því sólarhringsfrest í málinu en hitti Sindra aftur í dag og úrskurðaði hann í 19 daga gæsluvarðhald. Sindri lýsti því yfir að hann gerði enga athugasemd við framsal til Íslands og færi þangað sjálfviljugur.

Kuyp sagði við Vísi fyrr í dag að saksóknari í Hollandi muni sjá um að koma Sindra til Íslands, og það muni gerast innan tuttugu daga.

Sindri sagði við dómarann að hann hefði hvorki flúið Ísland né reynt að fela sig ytra. Hann hefði verið frjáls ferða sinna þegar hann yfirgaf Ísland. Þar hefði hann að eigin sögn verið beittur miklu ranglæti þegar honum var tilkynnt að hann væri frjáls ferða sinna en yrði handtekinn ef hann myndi yfirgefa fangelsið að Sogni. Hann hefði því ákveðið að yfirgefa landið til að geta sagt sína hlið, nú þegar hann væri búinn að því væri hann reiðubúinn að snúa aftur heim.

Sindri Þór strauk úr fangelsinu að Sogni aðfaranótt þriðjudagsins 17. apríl síðastliðinn og flaug samdægurs til Stokkhólms í Svíþjóð. Hann var handtekinn í miðborg Amsterdam síðastliðið sunnudagskvöld eftir að vegfarandi hafði látið lögreglu vita af honum.

Sindri hafði verið í gæsluvarðhaldi á Íslandi frá því febrúar vegna gruns um stórfelldan þjófnað á tölvubúnaði sem var notaður til að grafa eftir rafmyntinni Bitcoin.