Þurrt og hlýtt í næstu viku

Samkvæmt spákortum Veðurstofunnar mun snúast í frekar hæga suðvestlæga átt með morgninum. Því mun fylgja einhver væta vestantil á landinu en þó mun stytta að mestu upp um hádegi. Norðaustanlands verður áfram hlýjast eða upp í 20 stig, jafnvel allt að 22 stigum.

Fram yfir helgi er útlit fyrir mildar vestlægar áttir og frekar úrkomulítið veður um landið vestanvert, en þurrt og bjart með köflum fyrir austan. Á föstudag og laugardag bætir í vindinn, en á sjómannadaginn lægir aftur ef spár ganga eftir.

Þá má jafnvel gera ráð fyrir því að það muni heldur hlýna í veðri þegar fram er komið í næstu viku. Þá gæti jafnvel verið nokkuð þurrt á landinu, sem Reykvíkingar munu eflaust taka fagnandi eftir vætusamasta maímánuð frá því að mælingar hófust.

Veðurhorfur á landinu næstu daga

Á fimmtudag:

Vestlæg átt 3-10 m/s, skýjað V-lands og sums staðar súld við ströndina, en skýjað með köflum annars staðar. Hiti 8 til 18 stig, hlýjast SA-til.

Á föstudag:

Vestlæg átt, 5-15 m/s, hvassast NV-lands og yfirleitt skýjað, en bjart á köflum um landið austanvert. Hiti breytist lítið.

Á laugardag:

Suðvestlæg átt, sums staðar allhvöss eða hvöss og dálítil væta V-lands, en bjart með köflum A-til. Hiti 8 til 18 stig, hlýjast á austanverðu landinu.

Á sunnudag (sjómannadagurinn):

Vestlæg átt 3-8 m/s, skýjað og úrkomulítið um landið V-vert, en víða bjart A-til. Hiti svipaður.

Á mánudag og þriðjudag:

Hæg breytileg átt, þurrt og hlýnar heldur í veðri.