Mögulegar gleragnir í Stella Artois-bjór

Matvælastofnun varar við neyslu á tilteknum lotum af Stella Artois bjór vegna hugsanlegs galla í glerflöskum. Flöskurnar geta innihaldið gleragnir og hafa þessar tilteknu flöskur verið innkallaðar, að því er fram kemur í tilkynningu frá matvælaeftirliti Heilbrigðiseftirlits Reykjavíkur.

Um er að ræða Stella Artois bjór í 330 ml flöskum með best fyrir dagsetningum 06/12/18 og 07/03/19. Vínnes ehf. hefur innkallað vöruna í samráði við Heilbrigðiseftirlit Reykjavíkur.

Eftirfarandi upplýsingar auðkenna vöruna sem innköllunin einskorðast við:

• Vöruheiti: Stella Artois í 330 ml. glerflösku 
• Best fyrir dagsetning: 06/12/18 og 07/03/19 
• Framleiðandi: AB InBev 
• Ástæða innköllunar: Mögulegur galli í framleiðslu 330 ml glerflaskna.
• Framleiðsluland: Belgía 
• Innflytjandi: Vínnes ehf, Skútuvogi 1F, 104 Reykjavík 
• Dreifing: Vínbúðir ÁTVR, Fríhöfnin á Keflavíkurflugvelli, Fríhöfnin á Reykjavíkurflugvelli

Þá hefur diskasett fyrir börn, sem selt var í verslun Þorsteins Bergmanns í Hraunbæ 102 í Reykjavík, einnig verið innkallað. Ástæðan fyrir innkölluninni er að flæði formaldehýðs úr vörunni í matvæli fer yfir leyfilegt hámark, að því er fram kemur í frétt á vef Reykjavíkurborgar.

Í settinu eru: Skál, diskur, glas, skeið og gaffall úr bambustrefjum.

Eftirfarandi upplýsingar auðkenna vöruna sem innköllunin einskorðast við:

• Vöruheiti: 5er Set Kindergeschirr aus Bambusfaser – Kids Dish Set Bamboo Fiber.
• Framleiðsluland: Kína.
• Dreifing: Verslun Þorsteins Bergmanns, Hraunbæ 102, 110 Reykjavík.

Tilkynning um málið barst í gegnum hraðviðvörunarkerfi Evrópusambandsins um matvæli og fóður (RASFF). Í reglubundnu markaðseftirliti í Þýskalandi var athugað hversu mikið formaldehýð fór úr vörunni í matvæli og reyndist magnið vera 171 / 177 mg / kg (ppm). Samkvæmt löggjöf um efni og hluti sem ætlað er að komast í snertingu við matvæli má flæði formaldehýðs úr efnum og hlutum sem ætlað er að snerta matvæli ekki fara yfir 15 mg / kg (ppm).

Neytendur sem eiga vöruna eru beðnir um að farga henni. Nánari upplýsingar veitir verslun Þorsteins Bergmanns í síma 567 2867.