Tvö dónaleg haust gefa út sitt fyrsta lag í sautján ár

Hljómsveitin Tvö dónaleg haust sendir nú frá sér nýtt lag sem ber nafnið Vinna í mínum málum. Lagið er það fyrsta sem hljómsveitin sendir frá sér í 17 ár og er af plötu sveitarinnar, væntanlegri með haustinu og mun hún bera nafnið Miðaldra.

Það er óhætt að segja að í laginu kveði við nýjan tón og að gáskafullt gleðipönkið sem einkenndi fyrstu plötuna, Mjög fræg geislaplata, hafi vikið fyrir ljúfsárri sögu af miðaldra manni í leit að svörum við eigin breyskleikum. Hvort lagið og myndbandið endurspegli þroskasögu hljómsveitarmeðlima skal ósagt látið en líf hins miðaldra íslenska karlmanns er einmitt viðfangsefni nýju plötunnar.

Myndbandið var skotið í júní, að mestu í Vesturbæ Reykjavíkur. Það er Tryggvi Már – gítarleikari hljómsveitarinnar sem túlkar miðaldra dreng sem er að manna sig upp í að biðja konu sína afsökunar og taka við sér aftur á nýjum forsendum. Í hlutverki ömmunnar er Sigfríður Nieljohniusdóttir, 98 ára og eini 80 ára stúdent landsins á lífi. Leikstjóri er Guðmundur Ingi Þorvaldsson og um klippingu sá Ernir Ómarsson.

Þótt langt sé liðið síðan sveitin sendi frá sér nýtt lag hafa vinirnir í hljómsveitinni haldið þræði, spilað í partíum, afmælum og brúðkaupum og farið í tónleikaferð til Coventry. Í vetur hafa staðið yfir útsetningar, æfingar og upptökur á nýju efni sem nú fer að líta dagsins ljós.

Meðlimir hljómsveitarinnar eru Guðmundur Ingi Þorvaldsson, Ómar Örn Magnússon, Sigfús Ólafsson, Skúli Magnús Þorvaldsson, Stefán Gunnarsson og Tryggvi Már Gunnarsson. Upptökum á plötunni Miðaldra, stjórnar Þórður Gunnar Þorvaldsson. Sveitin er að sjálfsögðu á Facebook  og Youtube, ásamt því að allt efni sveitarinnar er aðgengilegt á Spotify.