Segir að Rúrik þurfi að vera duglegri á Instagram

„Þetta er bara rosalegt,“ sagði Manúela Ósk Harðardóttir í Brennslunni í dag um að Rúrik Gíslason sé kominn með yfir milljón fylgjendur á Instagram. „Ég hef bara aldrei séð annað eins og ég hef haft mikið gaman af því að fylgjast með þessu.“

Hún sagði að þetta væri svakalegt stökk á mjög skömmum tíma og fólk hafi oft mikið fyrir því að ná svona fylgi, sumir nái því samt aldrei.

Af hverju er ekki meira í gangi?

„Það er fólk út í heimi sem er með minna fylgi en þetta sem að þarf ekki einu sinni að vinna, sem að hefur Instagram sem sína aðaltekjulind.“

Manúela hrósaði útliti Rúriks í þættinum og sagði að hann væri sjarmerandi, mjög fallegur og hefði „allan pakkann.“

„Núna með þetta platform, hvað er hann að gera samt? Af hverju er ekki meira í gangi á Instagram? Það er það sem ég vil fá að sjá.“

Þarf að vinna meira með story á Instagram

Hjörvar og Kjartan Atli þáttastjórnendur Brennslunnar sögðu henni að HM keppnin væri líklega ástæðan fyrir því. Hjörvar velti því fyrir sér hvort að kannski vildi hann ekki stuða hinn venjulega stuðningsmann íslenska landsliðsins.

„Lykillinn á samfélagsmiðlum er að þekkja „the audience“ og núna er hann kominn með, örugglega svona 95 prósent af fylgjendunum hans eru ungar suður-amerískar stelpur er það ekki?“

Manúelu Ósk finnst því að Rúrik þurfi að fara að hugsa sinn gang þegar kemur notkun sinni á samfélagsmiðlinum.

„Hann mætti alveg vinna meira með story finnst mér, það er ekkert í story nema einhver flugvöllur.“

Hún hrósaði þó nýjustu mynd fótboltakappans á Instagram, sem hefur fengið meira en 378 þúsund „like“ síðan í gær. Rúrik birti mynd af sér með Ólafi Inga Skúlasyni í ferðaklæðnaði landsliðsins.

 

 

A post shared by Rurik Gislason (@rurikgislason) on Jun 24, 2018 at 1:33pm PDT

Verður að nýta sér vinsældirnar

„Ég er mjög ánægð með þessa mynd, þetta er mjög góð mynd.“

Manúela Ósk benti svo á að ef að Rúrik hefði „taggað“ sólgleraugnamerkið myndu gleraugun sennilega seljast upp. Hún telur að ef Rúrik gerir hlutina rétt geti hann gert það mjög gott á Instagram. Hjörvar sagði í þættinum að kannski þyrfti Rúrik að hafa einhvern eins og Manúelu með sér í liði til að aðstoða með þessi mál og halda í höndina á honum.

Þegar Manúela Ósk var beðin að útskýra fegurð og vinsældir Rúriks nefndi hún meðal annars augnsvipinn og hárið en líka skrokkinn og þá staðreynd að hann er góður í fótbolta líka.

„Hann er bara hot.“

Manúela Ósk bendir á að ef Rúrik myndi birta myndir af sér berum að ofan þá myndi fylgjendahópurinn stækka enn frekar. Hún ráðleggur þessari óvæntu samfélagsmiðlastjörnu að velja vel hvaða fyrirtæki hann tengir sig við.

„Hann verður að nýta sér þetta.“ 

Viðtalið í heild sinni má heyra í spilaranum hér að neðan: