Von á lægðum annan hvern dag út næstu viku

Landsmenn ættu að njóta veðursins í dag því að von er á lægðagangi út næstu viku. Helst mun sjá til sólar á Norðausturlandi og Austurlandi.

Skaplegt veður er víða um land og á höfuðborgarsvæðinu er glampasól, varla ský á himni og slefar hitinn meira að segja yfir tveggja stafa töluna.

„Í dag er bjartur og fallegur dagur í vændum,“ segir í hugleiðingum veðurfræðingsins á vef Veðurstofu Íslands. Þar segir þó einnig að á morgun muni veðrið breytast talsvert.

„Það er bara lægðagangur alla næstu viku,“ segir Björn Sævar Einarsson, veðurfræðingur hjá Veðurstofunni í samtali við Vísi um veðrið framundan.

„Það kemur lægð annan hvern dag. Það rétt dúrar á milli,“ segir Björn.

Lægðunum fylgir úrkoma sem að sögn Björns Sævars mun aðallega vera sunnan- og vestanlands. Þá sérstaklega næstkomandi miðvikudag þar sem útlit er fyrir „austanslagveðursrigningu um mest allt land.“

Helst er útlit fyrir að norðaustur- og austurlandi fari best út úr lægðaganginum sem framundan er og eru þokkalegar líkur á sólskyni og þurrviðri á þeim slóðum um helgina.

„En svo er rigning þar líka á mánudag,“ segir Björn Sævar. 

Veðurhorfur á landinu

Norðvestan 3-10 m/s og víða léttskýjað í dag. Hiti 8 til 16 stig, hlýjast sunnanlands. Vaxandi sunnanátt í nótt, 8-15 og rigning um landið vestanvert á morgun, en heldur hægari suðvestanátt og lengst af þurrt austantil. Hiti 8 til 20 stig, hlýjast á Austurlandi.

Veðurhorfur á landinu næstu daga



Á föstudag:

Suðvestan 5-13 m/s. Bjart veður NA- og A-lands, annars skýjað og súld eða rigning framan af degi. Hiti 7 til 12 stig en allt að 20 á Austurlandi.

Á laugardag:

Suðlæg átt, 5-13, og fer að rigna, fyrst SV-til, en þurrt NA-lands fram á kvöld. Hiti 8 til 12 stig, en 12 til 17 um landið NA-vert.

Á sunnudag:

Suðvestanátt, 3-10, og dálítil súld með köflum, en þurrt á N- og A-landi. Víða rigning um kvöldið. Hiti 8 til 12 stig, en 12 til 20 um landið NA-vert

Á mánudag:

Vestlæg átt, 5-13, með rigningu um nær allt land, mest á Norðurlandi. Hiti 6 til 12 stig.

Á þriðjudag:

Suðvestanátt og skúrir vestantil á landinu en bjartviðri austanlands. Hiti 6 til 12 stig, hlýjast austanlands.

Á miðvikudag:

Útlit fyrir austanslagveðursrigningu um mest allt land.