Hlaupið gæti haft áhrif á fjarskiptasamband

Fjarskiptafyrirtækið Míla varar við því að hlaupið í Skaftá gæti haft áhrif á fjarskiptasambönd á svæðinu. Fyrirtækið hefur lýst yfir óvissustigi á Suðurlandi vegna hlaupsins.

Strengjakerfi Mílu liggja um vatnasvæði Skaftár. Í tilkynningu frá fyrirtækinu kemur fram að kerfinu geti stafað hætta af eins stóru hlaupi og spáð hefur verið í ánni.

Starfsmenn Mílu og samstarfsaðilar á Suðurlandi eru sagðir í viðbragðsstöðu vegna hlaupsins.

Samkvæmt upplýsingum lögreglu er búist við því að hlaupið komi að efsta bænum í Skaftárdal um klukkan tíu til ellefu í kvöld.