Hvassviðri á föstudaginn

Útlit er fyrir ágætisveður í dag og á morgun, að því er veðurfræðingur á Veðurstofu Íslands sagði í samtali við Fréttablaðið í gærkvöldi.

„Það er útlit fyrir að það verði róleg vestanátt, frekar hægur vindur. Þrír til átta metrar á sekúndu og lítilsháttar skúrir eða slydduél en léttskýjað á Suðaustur- og Austurlandi.

Afar lítilli úrkomu er spáð á höfuðborgarsvæðinu. Segir veðurfræðingur að spáin geri ráð fyrir örfáum dropum.

Á föstudaginn er hins vegar spáð hvassviðri og rigningu víða. „Þá fyrst dregur til einhverra tíðinda.“