Fatlaður fær ekki bætur vegna tjóns

Fatlaður maður á ekki rétt á bótum úr ábyrgðartryggingu Reykjavíkurborgar vegna tjóns sem varð á bifreið hans. Úrskurðarnefnd í vátryggingamálum (ÚRVá) taldi um óhappatilvik að ræða.

Tjónið má rekja til atviks sem varð þegar maðurinn datt úr sæti ökutækis síns og sat fastur milli framsætis og lyftu sem er í bifreiðinni. Hringdi hann í starfsmenn heimaþjónustu Reykjavíkurborgar til að fá aðstoð.

Tveir slíkir komu og rak annar þeirra sig í stýripinna sem varð til þess að bílstjórasætið lyftist upp og höfuðpúði þess rakst í þakklæðninguna. Við það brotnaði klæðningin og einnig urðu frekari skemmdir á lofti bílsins og farþegasæti.

Tryggingafélag borgarinnar hafnaði bótaskyldu þar sem um aðstoð utan heimilis, og þar með heimilisþjónustu, hefði verið að ræða og þá hefði þetta verið óhappatilvik. ÚRVá féllst á síðari röksemdirnar og sagði að tjónið hefði ekki mátt rekja til saknæmrar eða ólögmætrar háttsemi. Tjónið lendir því á umræddum einstaklingi.