"Var eiginlega enginn pabbi“

Handboltakappinn fyrrverandi Sigfús Sigurðsson stendur nú vaktina í eigin fiskbúð í Skipholti. Hann er reyndur í bransanum, hefur starfað í Fiskikónginum við Sogaveg við árabil en undir niðri blundaði draumur um eigin rekstur.

Hálfgerð tilviljun réð því þó að Sigfús leiddist út í fisksölu árið 2013. Þá var handboltaferlinum lokið og hann fékk hvergi vinnu, var í fjárhagsvandræðum og seldi m.a. Ólympíusilfrið vegna skulda.

Sjá einnig: Sigfús seldi silfrið út af skuldum

Sigfús kveðst þakklátur Kristjáni í Fiskikónginum að hafa haft trú á sér á sínum tíma, en hann hefur í gegnum tíðina glímt við ýmsa innri djöfla eins og hann orðar það.

Þroskandi að verða pabbi í annað sinn

„Ég varð pabbi aftur í apríl 2013 og það var svona öðruvísi heldur en með son minn. Þegar hann fæðist ´95 þá var ég í tómu rugli, var í alls konar neyslu og var eiginlega bara hálfgerður skíthæll út á við. Maður var eiginlega enginn pabbi, ég var meira bara svona vinur eða stóri bróðir á tímabili fyrir hann. Svo núna eignast ég dóttur mína og þá er ég meira svona pabbi sko. Það þroskaði mig gríðarlega það ferli allt saman og ég hætti að vera strákurinn sem vildi enga ábyrgð taka í að vilja taka kannski of mikla ábyrgð stundum,“ segir Sigfús.

Í dag er hann hins vegar á góðum stað, ánægður með lífið í eigin rekstri og segist lítið sakna áranna í handboltanum. Fiskbúðarrekstur eigi vel við hann, enda bæði mannlegt og krefjandi starf.

„Ég er nú ágætlega brosmildur og finnst ekkert leiðinlegt að tala, eins og þú heyrir. Ég veit töluvert mikið um fiskinn, Kristján var náttúrulega með vinnslu líka þar sem ég var að læra og læra og læra og ég er að nýta þá reynslu hérna.“



Rætt verður við Sigfús í Íslandi í dag klukkan 18:55, strax eftir kvöldfréttir. Þar ræðir hann m.a. reksturinn, ferilinn, fíknina, ólympíusilfrið sem var selt og hvernig hann breyttist úr strák í boltaleik í fullorðinn ábyrgan einstakling.

Í myndspilaranum hér að neðan er hægt að horfa á þáttinn í heild sinni.