Dregið hefur úr aukningu notkunar heits vatns

Veitur segja að dregið hafi úr aukningu notkunar á heitu vatni úr hitaveitu félagsins á höfuðborgarsvæðinu frá því hún var mest í gær. Góðar viðtökur hafi fengist við áskorun til íbúa um að fara vel með heita vatnið en þó sé ekki hægt að fullyrða aðgerðir viðskiptavina séu farnar að skila sér, að svo stöddu.

Í yfirlýsingu segir að rennslið sé enn að aukast og þó dregið hafi úr aukningunni gefi veðurspár til kynna að enn sé hætta á því að draga þurfi úr afhendingu á heitu vatni til stórra notenda undir lok vikunnar. Það séu notendur sem kaupi vatnið með afslætti og þeim skilmálum að draga megi úr afhendingu til þeirra við þessar aðstæður.

Aukinn viðbúnaður verður áfram hjá Veitum og tilmæli til fólks um að fara vel með heita vatnið standa enn.

Hér að neðan má sjá myndband um hvernig best megi nýta heita vatnið.