BMW X4 M og BMW X3 M af árgerð 2020 verða 503 hestafla villidýr

Það er ekki að spyrja að atorkusemi M-sportbíladeildar BMW. Þar á bæ streyma hestaflabúntin í röðum og nýjustu afurðir hennar eru þessir BMW X4 M og BMW X3 M 503 hestafla orkuboltar af árgerð 2020. Bílarnir tveir verða með 3,0 lítra V6 vél með tveimur forþjöppum þar sem kreist verða út fleiri hestöfl en almennt finnast í jepplingum. Allt þetta afl gerir þá aflmestu jepplinga sem fá má nú um stundir.

Bílarnir verða einnig í boði í 473 hestafla útgáfum sem eru 4,2 sekúndur í hundraðið en aflmeiri gerðin fer sprettinn á 4,1 sekúndu. Báðir eru bílarnir fjórhjóladrifnir og með sömu 8 gíra sjálfskiptingu og finna má í BMW M5 sportbílnum. Það ríkir því enn mikið hestaflastríð á milli M-deildar BMW, AMG-deildar Mercedes-Benz og S og RS-bíla Audi. Hér er þó BMW að slá rækilega við sínum helstu keppinautum hvað afl varðar.