Óánægja og hræðsla í grasrót Framsóknar

Mikil óánægja er í grasrót Framsóknar með væntanlegt frumvarp landbúnaðarráðherra sem heimilar innflutning á hráu kjöti og eggjum til landsins. Viðmælendur blaðsins í grasrót Framsóknar telja óhugsandi að frumvarpsdrögin verði samþykkt í núverandi mynd og hafa flokksmenn litla trú á aðgerðaáætlun stjórnvalda sem ætlað er að tryggja vernd búfjárstofna.

Kristján Þór Júlíusson landbúnaðarráðherra hefur sagt að í ljósi dóma Hæstaréttar og EFTA-dómstólsins séu ekki aðrir kostir í stöðunni. Drög frumvarpsins eru nú í samráðsgátt stjórnvalda og stendur ráðherra fyrir opnum fundum um málið víða um land fram í næstu viku.

Sigurður Ingi Jóhannsson, formaður Framsóknarflokksins og samgönguráðherra, hefur gefið það út að of snemmt sé að segja til um afstöðu flokksins til frumvarpsins. Hann segir í svari við fyrirspurn Fréttablaðsins að andstaða Framsóknar við óheftan innflutning á hráu kjöti hafi lengi verið ljós. Afstaða flokksins byggi á vísindum og skynsemi. „Fundur sá sem Framsókn hélt í síðustu viku eftir langan undirbúning sýnir glöggt hver stefna okkar er. Við viljum opna augu fólks fyrir þeirri einstöku aðstöðu sem Ísland býr við og standa vörð um heilnæma matvælaframleiðslu á landinu.“

Sjá einnig: Kjötið þjappar saman Framsóknarmönnum

Heimildir blaðsins herma að málið gæti reynst Sigurði Inga erfitt í ljósi þess að í tíð sinni sem landbúnaðarráðherra skrifaði hann undir samning við ESB um lækkun tolla á búvörur og aukna innflutningskvóta. Sagði hann á sínum tíma að aukinn útflutningur þýddi kröfu um aukinn innflutning. Þingmenn Miðflokksins lögðu fram þingsályktunartillögu í fyrra um að segja upp samningnum.

Þeir Framsóknarmenn sem Fréttablaðið ræddi við voru sammála um að frumvarpsdrögin gengju of langt, ótækt væri að leyfa innflutning á hráu kjöti og að flokksforystan hlyti að koma í veg fyrir það. „Við erum nokkuð samstíga í því að það þarf að gera betur en þetta framvarp,“ segir Þórarinn Ingi Pétursson, varaþingmaður flokksins. „Ég vitna í samþykkt frá síðasta flokksþingi þar sem Framsóknarflokkurinn leggst gegn innflutningi á þessum vörum.“

Lilja Rannveig Sigurgeirsdóttir, formaður Sambands ungra Framsóknarmanna, segir að hún skynji hræðslu. „Þetta frumvarp hræðir fólk einfaldlega. Fólk vill ekki trúa því að þetta sé að gerast. Það hefur bara sýnt sig að oft þegar það kemur einhver nýr sjúkdómur þá fer hann með hraði yfir landið.“

Katrín Sigurjónsdóttir, sveitarstjóri í Dalvíkurbyggð, segir hreinleika landbúnaðarins skipta meira máli en að opna landið fyrir erlendum mörkuðum. Vildi hún svo koma eftirfarandi skilaboðum til Kristjáns Þórs: „Ég segi sem Svarfdælingur, ég vil að okkar svarfdælski ráðherra standi í báðar sínar svarfdælsku lappir í þessu máli.“